Rajashtan News: सिनेमा सुरु असताना अचानक प्रेक्षकांची पळापळ अन् किंकाळ्या, INOX थिएटरमध्ये काय घडलं?

राजस्थानमधील कोटा शहरातील एका नामांकित मल्टिप्लेक्समध्ये एक धक्कादायक प्रकार समोर आला आहे. अहलुवालिया मॉलमध्ये असलेल्या आयनॉक्स (INOX) सिनेमा हॉलमध्ये रात्रीचा शो सुरू असताना अचानक छताची फॉल सीलिंग खाली कोसळली. प्रत्यक्ष चित्रपट सुरू असतानाच हा प्रकार घडल्यामुळे थिएटरमध्ये एकच गोंधळ उडाला. छत कोसळत असल्याचे पाहून प्रेक्षकांनी तात्काळ आपापल्या जागा सोडल्या आणि जीव वाचवण्यासाठी दरवाजाच्या दिशेने धाव घेतली.

चित्रपट सुरू असतानाच ढिगारा आला खाली

थिएटरमध्ये उपस्थित असलेल्या प्रत्यक्षदर्शींनी दिलेल्या माहितीनुसार, सर्व प्रेक्षक शांतपणे रात्रीच्या शोचा आनंद घेत होते. चित्रपट मध्यांतराच्या पुढे गेला असतानाच अचानक छताचा एक मोठा हिस्सा खाली पडला. यावेळी मोठा आवाजही झाला. रात्रीच्या अंधारात अचानक झालेल्या या मोठ्या आवाजामुळे आणि पडणाऱ्या मलब्यामुळे लोक प्रचंड घाबरले.  ज्या ठिकाणी सीलिंगचा भाग पडला, त्या बाजूला प्रेक्षक थोडे लांब होते. या संपूर्ण अपघातात कोणत्याही प्रेक्षकाला गंभीर दुखापत झालेली नाही, ज्यामुळे एक मोठा अनर्थ टळला.

(नक्की वाचा-  मित्राचा जेवणाचा डब्बा पाहून विद्यार्थ्यांची शिक्षकांकडे धाव, पालकांच्या तक्रारीनंतर विद्यार्थ्याच्या आईला अटक)

घटनेची माहिती मिळताच मॉल व्यवस्थापन आणि आयनॉक्स सिनेमा हॉलचे सुरक्षा कर्मचारी तातडीने स्क्रीनच्या आत पोहोचले. पुढील धोका आणि सुरक्षेचा उपाय म्हणून चित्रपटाचे प्रक्षेपण तिथेच थांबवण्यात आले. कर्मचाऱ्यांनी तात्काळ सर्व प्रेक्षकांना अत्यंत सुरक्षितपणे थिएटरच्या बाहेर काढले.

(नक्की वाचा-  Crime News: सोशल मीडियावर 'शो-ऑफ' पडला महागात! प्रसिद्ध महिला युट्यूबरच्या घरावर दरोडा; कुटुंबाला खोलीत कोंडलं)

या धक्कादायक घटनेनंतर आता मॉल प्रशासनाच्या बांधकामावर आणि देखभालीवर गंभीर प्रश्नचिन्ह उपस्थित केले जात आहेत. सुरक्षेच्या कारणास्तव सध्या तो सिनेमा हॉल तात्पुरता बंद करण्यात आला असून, तज्ज्ञांच्या मदतीने संपूर्ण छताची आणि एसीच्या फिटिंगची सखोल तपासणी केली जात आहे.