Mumbai Local Train News: मुंबईकरांची जीवनवाहिनी असलेल्या मध्य रेल्वे लोकल ट्रेनच्या प्रवाशांसाठी एक अत्यंत मोठी आणि दिलासा देणारी बातमी समोर आली आहे. लोकलमध्ये होणारी प्रचंड गर्दी आता कमी होणार आहे, कारण मध्य रेल्वे लवकरच 15 डब्यांच्या लोकल ट्रेनची संख्या वाढवणार आहे. यासाठी, मध्य रेल्वेच्या मुंबई मंडळातील 34 रेल्वे स्थानकांपैकी 27 स्थानकांच्या प्लॅटफॉर्म विस्तारीकरणाचे काम डिसेंबर 2025 पर्यंत पूर्ण करण्याचा प्रयत्न आहे. हे काम पूर्ण होताच 15 डब्यांच्या लोकल सेवेत दाखल होतील आणि प्रवाशांचा प्रवास अधिक सुखकर आणि आरामदायी होईल.
प्रवाशांची मागणी मान्य
मुंबई लोकलच्या गर्दीमुळे, प्रवाशांची नेहमीच मागणी होती की 12 डब्यांच्या सध्याच्या गाड्यांऐवजी 15 डब्यांच्या लोकल चालवण्यात याव्यात. रेल्वे प्रशासनाने अखेर या मागणीला सकारात्मक प्रतिसाद दिला आहे. 15 डब्यांची लोकल धावल्यास, एका फेरीत अधिक प्रवासी प्रवास करू शकतील आणि गर्दीचे प्रमाण लक्षणीयरीत्या कमी होईल.
'झी 24 तास' नं दिलेल्या वृत्तानुसार, 15 डब्यांच्या लोकल फास्ट (Fast) आणि स्लो (Slow) अशा दोन्ही मार्गिकांवर धावणार आहेत. सुरुवातीला, सध्या कार्यरत असलेल्या 12 डब्यांच्या काही लोकलचे रूपांतर 15 डब्यांमध्ये केले जाणार आहे आणि त्यानंतर टप्प्याटप्प्याने ही संख्या वाढवण्यात येईल.
( नक्की वाचा : Thane News : घोडबंदर रोडवरील ट्रॅफिक जामपासून सुटका होण्यासाठी सरनाईक यांनी दिले अंतिम टाईम टेबल, वाचा सविस्तर )
कधी होणार काम पूर्ण?
मध्य रेल्वेने प्लॅटफॉर्म विस्तारीकरणासाठी मोठी मोहीम हाती घेतली आहे. मुंबई मंडळातील एकूण 34 रेल्वे स्थानकांमध्ये हे काम सुरू आहे. मध्य रेल्वेचे जनसंपर्क अधिकारी स्वप्नील नीला यांनी सांगितले की, यापैकी 27 स्थानकांचे काम डिसेंबर 2025 पर्यंत पूर्ण करण्याचा त्यांचा प्रयत्न आहे. हे काम पूर्ण झाल्यानंतरच 15 डब्यांच्या लोकलची संख्या वाढवता येईल.
या यादीत सर्वाधिक स्थानके कल्याण ते खोपोली आणि कल्याण ते कसारा या मार्गावर आहेत. यामुळे या पट्ट्यातील लांब पल्ल्याच्या प्रवाशांना विशेष फायदा होणार आहे.
कोणत्या स्टेशनचा होणार विस्तार?
डिसेंबरपर्यंत काम पूर्ण होणारी स्थानके: विठ्ठलवाडी, उल्हासनगर, कर्जत, खोपोली, अंबरनाथ, आंबिवली, वाशिंद, आसनगाव, आटगाव, शैलू, बदलापूर, भिवपुरी, पळसधरी, मुंब्रा, कळवा, कोपर, ठाकुर्ली, टिटवाळा, कसारा.
विस्तारीकरणाचे काम सुरू असलेली इतर स्थानके: सीएसएमटी (CSMT), ठाणे, कल्याण, डोंबिवली, वांगणी आणि खडावली.
नव्या वर्षात नवे वेळापत्रक आणि एसी लोकलची वाढ
स्थानकांच्या विस्तारीकरणाच्या कामामुळे, दरवर्षी नोव्हेंबरमध्ये होणारे वेळापत्रक (Time Table) अपडेट या वर्षी करण्यात आले नाही. मात्र, हे मोठे काम पूर्ण झाल्यावर नव्या वर्षात लोकलचे वेळापत्रक अपडेट केले जाईल.
याशिवाय, मध्य रेल्वेच्या ताफ्यात नवीन एसी लोकल दाखल होणार आहेत. यामुळे एसी लोकल सेवांमध्ये वाढ होईल. सध्या मध्य रेल्वेकडे 6 एसी लोकल असून, त्यांच्या दररोज सुमारे 80 फेऱ्या होतात. या नवीन एसी लोकल हार्बर (Harbour) लाइन किंवा मेन लाइनवर चालवल्या जाण्याची शक्यता आहे.
