राहुल कांबळे
सिडकोने “प्रथम येणाऱ्यास प्रथम प्राधान्य” ही योजना जाहीर केली आहे. त्यानुसार 4,508 सदनिका विक्रीस काढण्यात आल्या आहेत. या योजनेची लॉटरी काढण्यात येणार नाही. तर जो पहिला येईल त्याला ते घर प्राधान्यानं देण्यात येणार आहेत. त्यामुळे अनेकांनी या योजनेत रस दाखवला आहे. सुरूवातीला या योजनेत ऑनलाईन अर्ज करताना अडचणी येत होत्या. तरी ही एका आठवड्यात या योजनेला चांगला प्रतिसाद मिळाल्याचा दावा सिडको तर्फे करण्यात आला आहे. साधारण एक महिन्यापर्यंत या योजनेत ऑनलाईन रजिस्ट्रेशन करता येणार आहे.
सिडकोच्या गृहनिर्माण योजनेस नागरिकांचा उदंड प्रतिसाद मिळत आहे. योजनेचा प्रारंभ झाल्यापासून आजपर्यंत 14,796 अर्जदारांनी ऑनलाइन नोंदणी केली आहे. त्यांनी ऑनलाईन कागदपत्रे ही सादर केली आहेत अशी माहिती सडकोच्या जनसंपर्क अधिकारी प्रिया रातांबे यांनी दिली आहे. या संपूर्ण प्रक्रियेसाठी सिडकोतर्फे 21 डिसेंबर 2025 पर्यंत कालावधी देण्यात आला आहे. त्यामुळे ज्यांना अर्ज करायचा आहे त्यांना आणखी संधी आहे.
सिडकोतर्फे प्रथमच “प्रथम येणाऱ्यास प्रथम प्राधान्य” या तत्वावर सादर करण्यात आलेल्या योजनेला नागरीक भरघोस प्रतिसाद देत आहेत. येत्या काही दिवसांत आणखी नागरीक आपले घराचे स्वप्न पूर्ण करण्यासाठी सिडकोच्या या गृहनिर्माण योजनेत सहभागी होतील अशी सिडकोला खात्री आहे. अर्जदारांच्या कागदपत्रांची छाननी करून, पात्र अर्जदारांची योजनेकरिता अंतिम नोंदणी करून 28 डिसेंबर 2025 पासून पात्र अर्जदार आपले पसंतीचे घर ऑनलाईन पद्धतीने निवडू शकतील. आपल्या हक्काच्या घराचे स्वप्न पाहणाऱ्या प्रत्येकाचे स्वप्न सिडकोच्या या गृहनिर्माण योजनेतून नवीन वर्षात साकार होईल यात काही शंका नाही असं सिडकोच्या जनसंपर्क अधिकारी प्रिया रातांबे यांनी सांगितलं.
या योजने अंतर्गत सिडकोने मोक्याच्या ठिकाणी घरं उपलब्ध करून दिली आहेत. त्यात खारघर, कळंबोली, तळोजा या ठिकामचा समावेश आहे. विशेष म्हणजे ही घरं रेडी टू मुव्ह स्वरूपाची आहेत. त्यामुळे ज्या व्यक्तीला हे घर लागेल त्याला लगेचच पैसे भरल्यानंतर त्या घराचा ताबा मिळणार आहे. या सर्व घरांच्या परिसरात चांगल्या सोयीसुविधा आहेत. त्यामुळे अनेकांनी ही घरं मिळाली यासाठी अर्ज केले आहेत. त्यामुळे येणाऱ्या दिवसात या योजनेला आणखी किती प्रतिसाद मिळेल याकडे ही लक्ष लागले आहे.
