Eid E Milad 2025 Holiday: राज्य सरकारने मुंबई शहर आणि उपनगर जिल्ह्यांसाठी ईद-ए-मिलादच्या सार्वजनिक सुट्टीत बदल केला आहे. यापूर्वी 5 सप्टेंबर रोजी असलेली सुट्टी आता 8 सप्टेंबर रोजी असेल. या निर्णयानुसार, मुंबई आणि उपनगरांतील सर्व बँका देखील आता शुक्रवार, 5 सप्टेंबरऐवजी सोमवार, 8 सप्टेंबर रोजी बंद राहतील, असे रिझर्व्ह बँकेने (RBI) जाहीर केले आहे. मुळे, शुक्रवार, 5 सप्टेंबर रोजी मुंबईतील बँकांचे कामकाज नेहमीप्रमाणे सुरू राहणार आहे.
का घेण्यात आला निर्णय?
गणेशोत्सव आणि ईद-ए-मिलाद हे दोन मोठे सण एकाच वेळी येत असल्याने हा निर्णय घेण्यात आला. 10 दिवसांच्या गणेशोत्सवाची सांगता 6 सप्टेंबर रोजी अनंत चतुर्दशीला होणार आहे. या दिवशी गणपती विसर्जन मिरवणुका निघतात, ज्यात मोठ्या संख्येने लोक एकत्र येतात.
यामुळे 5 आणि 6 सप्टेंबर असे सलग दोन दिवस मोठ्या मिरवणुका आणि गर्दी व्यवस्थापनाचे आव्हान प्रशासनासमोर उभे राहिले होते. नागरिक सेवा आणि पोलिसांवरील ताण कमी करण्यासाठी, तसेच गर्दी आणि वाहतूक व्यवस्थापन अधिक चांगल्या प्रकारे हाताळण्यासाठी ईद-ए-मिलादची सुट्टी पुढे ढकलण्याचा निर्णय घेण्यात आला आहे.
( नक्की वाचा : Eid E Milad 2025 Holiday: सोमवारीही शाळा, कॉलेज आणि ऑफिस बंद राहणार ? सरकारने दिली माहिती )
इतर जिल्ह्यांसाठी बदल नाही
नेगोशिएबल इन्स्ट्रुमेंट्स ॲक्ट, 1881 च्या कलम 25 अंतर्गत ही तारीख सुधारित करण्यात आली आहे. हे स्पष्ट करण्यात आले आहे की, सुट्टीत केलेला बदल केवळ मुंबई शहर आणि मुंबई उपनगर जिल्ह्यांसाठीच लागू आहे. महाराष्ट्रातील इतर सर्व जिल्ह्यांमध्ये ईद-ए-मिलादची सुट्टी मूळ वेळापत्रकानुसार 5 सप्टेंबर रोजीच असेल.
मुंबईतील सरकारी कार्यालये 5 सप्टेंबरला सुरू राहतील
सामान्य प्रशासन विभागाने जारी केलेल्या परिपत्रकात असेही स्पष्ट केले आहे की, "मुंबई शहर आणि उपनगरातील सरकारी कार्यालये 5 सप्टेंबर रोजी नेहमीप्रमाणे सुरू राहतील."
