Navi Mumbai International Airport: नवी मुंबईच्या आकाशात 15 सप्टेंबर 2026 रोजी एक नवा इतिहास रचला गेला आहे. बाकू, अझरबैजान येथून उडालेल्या सिल्क वे वेस्ट एअरलाइन्सच्या अवाढव्य मालवाहू विमानाने नवी मुंबई आंतरराष्ट्रीय विमानतळावर (NMIA) यशस्वी लँडिंग केले. जगातील सर्वात मोठे दुहेरी इंजिन असलेले बोईंग 777एफ (Boeing 777F) हे विमान तब्बल 90 टन आयात माल घेऊन धावपट्टीवर उतरले आणि या ऐतिहासिक क्षणासोबतच नवी मुंबई विमानतळावरून अधिकृतपणे मालवाहू विमान सेवांचा (Freighter Operations) धडाकेबाज प्रारंभ झाला.
नवी मुंबई आंतरराष्ट्रीय विमानतळावरून सुरू झालेल्या या पहिल्यावहिल्या आंतरराष्ट्रीय कार्गो सेवेमुळे भारताचा थेट अझरबैजानच्या बाकू शहराशी हवाई संपर्क जोडला गेला आहे. या नव्या व्यापार मार्गामुळे भारत, सीआयएस (CIS) देश, युरोप आणि पश्चिम आशियातील प्रमुख बाजारांमध्ये मालाची वाहतूक करणे कमालीचे सोपे आणि जलद होणार आहे. आंतरराष्ट्रीय व्यापाराच्या दृष्टीने पश्चिम भारतासाठी नवी मुंबई हे आता एक अत्यंत महत्त्वाचे 'कार्गो गेटवे' म्हणून उदयास आले आहे.
या विशेष विमानाच्या स्वागतासाठी विमानतळ प्रशासनाने मोठी तयारी केली होती. बाकू येथून हजारो किलोमीटरचा प्रवास करून आलेले हे महाकाय विमान जसे नवी मुंबईत उतरले, तसा संपूर्ण परिसर या ऐतिहासिक घडामोडीचा साक्षीदार बनला. येत्या काळात या विमानतळावरून आयात-निर्यात क्षेत्राला मोठा वेग मिळणार असून, स्थानिक उद्योग आणि व्यापारी जगतासाठी हे नवे उड्डाण अत्यंत फायदेशीर ठरणार आहे.
