ICC Women's T20 WC India Vs Australia: आयसीसी महिला टी-२० विश्वचषक २०२६ भारतीय संघ लाजिरवाण्या पराभवासह बाहेर पडला आहे. गट टप्प्यातील आपल्या अंतिम सामन्यात भारताला सहा वेळच्या विजेत्या ऑस्ट्रेलियाकडून ६ गडी राखून पराभव पत्करावा लागला. या पराभवामुळे हरमनप्रीत कौरच्या नेतृत्वाखालील भारतीय संघाचे विश्वचषकातील आव्हान संपुष्टात आले. भारताच्या पराभवामुळे दक्षिण आफ्रिकेने उपांत्य फेरीतील आपले स्थान निश्चित केले. दुसरीकडे ऑस्ट्रेलियाने एकही सामना न गमावता थेट उपांत्य फेरीत प्रवेश केला.
लॉर्ड्सवरील हा सामना केवळ भारतानेच नव्हे, तर दक्षिण आफ्रिकेचा संघ आणि त्यांच्या चाहत्यांनीही उत्सुकतेने पाहिला. या गटातून ऑस्ट्रेलियाचे उपांत्य फेरीतील स्थान आधीच निश्चित झाले होते, तर दुसऱ्या स्थानासाठीचा सामना भारतीय संघ आणि दक्षिण आफ्रिका यांच्यात खेळला गेला. भारत-ऑस्ट्रेलिया सामन्याच्या काही काळापूर्वी दक्षिण आफ्रिकेने त्याच मैदानावर झालेल्या रोमांचक अंतिम गट सामन्यात बांगलादेशला हरवून ८ गुण मिळवले होते. तथापि त्यांचा नेट रन रेट भारतापेक्षा कमी होता. त्यामुळे भारतीय संघाला पुढे जाण्यासाठी केवळ एका विजयाची गरज होती.
हरमनप्रीतची दमदार खेळी
सामन्यात भारतीय संघाने प्रथम फलंदाजी करण्याचा निर्णय घेतला आणि स्मृती मंधाना व शफाली वर्मा (३४) या जोडीने दमदार सुरुवात केली. विशेषतः शफालीने चौकार मारण्यावर लक्ष केंद्रित केले. मात्र, पॉवरप्लेनंतर त्यांच्या धावांचा वेग मंदावला. १० व्या षटकात ६६ धावांवर ही भागीदारी तुटली आणि त्यानंतर १२ व्या षटकात मंधाना धावबाद झाली. मंधाना १२ व्या षटकापर्यंत खेळपट्टीवर टिकून होती, पण ३७ चेंडूंमध्ये तिला केवळ ३८ धावाच करता आल्या.
त्यानंतर कर्णधार हरमनप्रीत कौरने जेमिमा रॉड्रिग्ज (३४) हिच्यासोबत डाव सावरला. मग, शेवटच्या षटकात, हरमनप्रीतने (५६) सलग तीन षटकार ठोकून २५ चेंडूंमध्ये आपले अर्धशतक पूर्ण केले आणि भारताला १७० धावांची भक्कम धावसंख्या उभारण्यास मदत केली. दुसरीकडे, ऑस्ट्रेलियाने पहिल्याच षटकात आपली पहिली विकेट गमावली असली तरी, त्यांच्या फलंदाजांनी छोट्या भागीदारी रचून धावसंख्या पुढे नेली. मात्र, १० व्या षटकात बेथ मूनीची तिसरी विकेट पडली तेव्हा धावसंख्या केवळ ६८ होती. ऑस्ट्रेलियासाठी परिस्थिती कठीण दिसत होती.
पेरीने सामना फिरवला..
पण त्याच क्षणी, महिला क्रिकेटच्या इतिहासातील सर्वोत्कृष्ट खेळाडू एलिस पेरी आणि संघाची दुसरी बलाढ्य अष्टपैलू खेळाडू ॲशले गार्डनरने सूत्रे हाती घेतली. त्यानंतर त्यांनी चौकार-षटकारांची बरसात सुरू केली आणि बरोबर १०० धावांची भागीदारी करून सामना आपल्या बाजूने वळवला. पेरीच्या ३८ चेंडूंतील नाबाद ५६ धावा आणि गार्डनरच्या २९ चेंडूंतील ५३ धावांनी १९ षटकांत विजय निश्चित केला.
