Akola News : जगायचं होतं सोबत, पण नशिबाने....अकोल्यातील शिक्षिका आणि ड्रायव्हरच्या प्रेमाचा असा झाला शेवट

योगेश शिरसाट, प्रतिनिधी

Akola News : अकोला जिल्ह्यातील बाळापूर तालुक्यात असलेल्या शेळद गावात एक अतिशय धक्कादायक आणि हृदयद्रावक घटना उघडकीस आली आहे. एकमेकांवर जीवापाड प्रेम करणाऱ्या एका प्रेमीयुगुलाने कुटुंबाच्या टोकाच्या विरोधामुळे मृत्यूला आलिंगन दिले आहे. बुधवारी 31 डिसेंबर रोजी कसुरा गावाजवळील रेल्वेमार्गावर या दोघांचे मृतदेह आढळून आल्याने संपूर्ण परिसरात खळबळ उडाली आहे.

काय आहे प्रकरण?

अक्षय सुरेश थारकर (वय 32) आणि अक्षदा मोहन शेजोळे (वय 24) अशी मृतकांची नावे असून दोघेही शेळद परिसरातील रहिवासी होते. अक्षय हा वाहन चालक म्हणून काम करत होता, तर अक्षदा अंत्री येथील एका कॉन्व्हेंट शाळेत शिक्षिका म्हणून कार्यरत होती. गेल्या अनेक वर्षांपासून त्यांचे प्रेमसंबंध होते आणि त्यांना विवाह करून संसार थाटायचा होता.

 मात्र, त्यांच्या या नात्याला दोन्ही कुटुंबांकडून प्रचंड विरोध होता. घरच्यांच्या या विरोधामुळे दोघेही मानसिक तणावाखाली होते. शेवटी या विरोधाला कंटाळून त्यांनी रेल्वेखाली धाव घेत आपले जीवन संपवल्याचा प्राथमिक अंदाज वर्तवण्यात येत आहे.

(नक्की वाचा : Akola News : सत्तेची नशा उतरवली! एका सहीने अख्खी ग्रामपंचायत घरी धाडली, काय आहे प्रकरण? )
 

स्थानिक नागरिकांना रेल्वेमार्गालगत मृतदेह दिसल्यानंतर त्यांनी तातडीने उरळ पोलिसांना याची माहिती दिली. घटनेचे गांभीर्य ओळखून उरळ पोलीस ठाण्याचे ठाणेदार पंकज कांबळे यांच्या मार्गदर्शनाखाली पोलीस उपनिरीक्षक गणेश कायंदे आणि त्यांचे पथक तातडीने घटनास्थळी दाखल झाले. पोलिसांनी पंचनामा करून दोन्ही मृतदेह उत्तरीय तपासणीसाठी अकोला येथील जिल्हा सामान्य रुग्णालयात पाठवले. या दोन्ही मृतदेहांचे शवविच्छेदन करण्यात आले आहे.

या घटनेमुळे शेळद गावावर शोककळा पसरली असून परिसरात हळहळ व्यक्त होत आहे. मनमिळावू आणि कष्टाळू असलेल्या या तरुणांनी अशा प्रकारे टोकाचे पाऊल उचलल्याने अनेक प्रश्न उपस्थित होत आहेत. उरळ पोलिसांनी या प्रकरणी अकस्मात मृत्यूची नोंद केली असून, नातेवाईक आणि मित्रपरिवाराचे जबाब नोंदवण्याचे काम सुरू आहे. या प्रकरणाचा अधिक तपास पोलीस करत आहेत.