आई आणि मुलाचे नाते जगातील सर्वात अनोख्या आणि गोड नात्यांपैकी एक मानले जाते. प्रेम आणि विश्वासाच्या या अमूल्य नात्यावर जेव्हा डाग लागतो, तेव्हा मन सुन्न होते. छत्तीसगडच्या जशपूरमध्ये अशीच एक भयानक घटना घडली आहे. ज्या आईने नऊ महिने आपल्या मुलाला पोटात वाढवले, छातीशी लावून मोठे केले, त्याच कलियुगी मुलाने कुऱ्हाडीचे सपासप वार करून आईचे तुकडे-तुकडे केले. जी आई आपल्या मुलासाठी जीव ओवाळून टाकत होती, तिचाच जीव त्याने घेतला.
आईची हत्या करून गायली गाणी
जशपूर जिल्ह्यातील कुनकुरी पोलीस स्टेशन हद्दीत जीतराम यादव नावाच्या व्यक्तीने आपली आई गुला बाई हिची निर्घृणपणे हत्या केली. हत्येनंतर तो आईच्या मृतदेहाशेजारी बसून गाणी गुणगुणत राहिला. त्यानंतर मातीशी खेळत राहिला. जेव्हा गावकऱ्यांनी त्याचे हे कृत्य पाहिले, तेव्हा त्यांना धक्का बसला. जो कोणी त्याला पकडण्यासाठी जात होता, तो कुऱ्हाड घेऊन त्याच्या मागे धावत होता. पोलिसांनीही खूप प्रयत्नांनंतर त्याला ताब्यात घेतले.
कुऱ्हाडीने आईचे तुकडे-तुकडे केले
ही भयानक घटना कुनकुरी पोलीस स्टेशन हद्दीतील रेस्ट हाऊससमोरील बेदरभद्रा वस्तीत घडली. येथे जीतराम यादव नावाच्या व्यक्तीने मंगळवारी सकाळी आपल्या आईवर कुऱ्हाडीने इतके वार केले की मृतदेहाचे अनेक तुकडे झाले. हे विकृत कृत्य केल्यानंतर आरोपी त्याच कुऱ्हाडीला हातात घेऊन मृतदेहाशेजारी बसला होता. या घटनेनं सर्वच जण हादरले होते. शिवाय या कृत्यानंतर याला मुलगा म्हणावे का असा प्रश्न पडतो.
पकडण्यासाठी आलेल्या लोकांवर कुऱ्हाड चालवली
घटनेची माहिती मिळताच लोकांची मोठी गर्दी जमली. माहिती मिळताच थोड्याच वेळात कुनकुरी पोलीसही घटनास्थळी पोहोचले. पण मृतदेहाशेजारी कुऱ्हाड घेऊन बसलेल्या आरोपीजवळ जाण्याचे धाडस कोणीही करत नव्हते. आरोपी ज्याला कोणालाही पाहत होता, त्याच्यावर कुऱ्हाड चालवायला सुरुवात करत होता. लोक घाबरून पळून जात होते. पोलिसांनीही त्याला पकडण्याचा प्रयत्न केला. तेव्हा त्याने खूप दहशत निर्माण केली.
कुटुंबीयांनी पळून वाचवला जीव
स्थानिक लोकांनी सांगितले की, घटनेच्या वेळी घरातील इतर सदस्यही तिथे होते. ज्यांना सुरक्षितपणे बाहेर काढण्यात आले. शेजाऱ्यांच्या मते, जीतराम केरळमध्ये काम करत होता. त्याच वेळी त्याची मानसिक स्थिती बिघडली होती. घरच्यांना जेव्हा त्याची मानसिक स्थिती ठीक नसल्याचे कळले, तेव्हा दोन दिवसांपूर्वी ते त्याला कुनकुरीला घेऊन आले. जशपूरचे एसएसपी शशिमोहन सिंह यांनी सांगितले की, प्राथमिक तपासणीत आरोपीची मानसिक स्थिती ठीक वाटत नाही. हे देखील शक्य आहे की त्याने कोणत्या प्रकारचे व्यसन केले असेल. अशा परिस्थितीत, वैद्यकीय तपासणीनंतरच काही ठोसपणे सांगितले जाऊ शकते. ते म्हणाले की, हत्येमागील कारणांची सर्व बाजूंनी तपासणी केली जात आहे. जीतरामने आपल्या आईची एवढ्या निर्घृणपणे हत्या का केली, हे चौकशी आणि वैद्यकीय तपासणीनंतरच स्पष्ट होईल.
