NEET paper leak : वैद्यकीय क्षेत्रातील प्रवेशासाठी अत्यंत महत्त्वाची मानली जाणारी नीट परीक्षा यंदा पेपर लीक प्रकरणामुळे देशभरात चर्चेत आहे. या प्रकरणाचे धागेदोरे आता नाशिकपर्यंत पोहोचले असून एका मेडिकल विद्यार्थ्याला तपास यंत्रणांनी ताब्यात घेतले आहे. या कारवाईमुळे शिक्षण क्षेत्रात मोठी खळबळ उडाली असून या रॅकेटचे कनेक्शन थेट मध्य प्रदेशपर्यंत जोडले जात असल्याचे समोर येत आहे.
कोण आहे शुभम खैरनार?
तपास यंत्रणांच्या रडारवर आलेल्या या आरोपीचे नाव शुभम खैरनार आहे. शुभमचे स्वतःचे शिक्षण वैद्यकीय क्षेत्रात सुरू असल्याने या संपूर्ण प्रकरणात त्याचे नाव येणे ही अत्यंत गंभीर बाब मानली जात आहे. शुभम खैरनारचे कनेक्शन मध्य प्रदेशातील सीहोर येथील श्री सत्य साई युनिव्हर्सिटीशी जोडले गेले आहे. अधिक माहितीनुसार, त्याने 2021 मध्ये या विद्यापीठात बीएएमएस म्हणजेच आयुर्वेद चिकित्सा कोर्ससाठी प्रवेश घेतला होता. मात्र, त्याचे शैक्षणिक रेकॉर्ड पाहिल्यास काही धक्कादायक बाबी समोर आल्या आहेत.
शुभम खैरनारने विद्यापीठात प्रवेश तर घेतला होता, पण तो कधीही कॉलेजला गेलाच नसल्याची माहिती समोर आली आहे. विद्यापीठाचे कुलगुरू मुकेश तिवारी यांनी स्पष्ट केले की, प्रवेश प्रक्रियेनंतर शुभमची वर्गातील उपस्थिती शून्य होती. त्याने केवळ कागदोपत्री प्रवेश घेतला होता, पण तो कधीही नियमित विद्यार्थी म्हणून तिथे वावरला नाही.
( नक्की वाचा : SSC Result 2026: दहावीचा निकाल लागला पण स्क्रिनवर काहीच दिसेना! 4 दिवसांपासून शेकडो विद्यार्थी तणावाखाली... )
या माहितीमुळे तपास यंत्रणांचा संशय अधिक बळावला असून, शुभम आधीपासूनच एखाद्या संघटित गुन्हेगारी नेटवर्कचा भाग होता का, या दिशेने आता शोध सुरू झाला आहे.
नीट पेपर लीक प्रकरणात शुभम खैरनार याची भूमिका अत्यंत महत्त्वाची मानली जात आहे. तो स्वतः मेडिकल बॅकग्राऊंडचा असल्याने या रॅकेटमध्ये त्याचे नेमके काम काय होते आणि तो कोणाच्या संपर्कात होता, याचा तपास आता वेगाने सुरू आहे.
पेपर लीकचा मूळ स्त्रोत आणि पुरवठा साखळी शोधण्यासाठी त्याची चौकशी अत्यंत मोलाची ठरणार आहे. या नेटवर्कमध्ये आणखी काही मेडिकल विद्यार्थ्यांचा समावेश असण्याची शक्यता नाकारता येत नाही.
( नक्की वाचा : Pune News: आई-वडिलांचं मौन मुलीच्या जीवावर बेतलं; पुण्यात 18 वर्षांच्या श्रुतीचा भयंकर शेवट ! नेमकं काय घडलं? )
पेपर फुटीचे जाळे कुठवर?
आतापर्यंत झालेल्या तपासानुसार, नीट पेपर लीकचे जाळे केवळ एका राज्यापुरते मर्यादित नसून ते हरियाणा, राजस्थान आणि महाराष्ट्र अशा विविध राज्यांमध्ये पसरलेले आहे. महाराष्ट्रातील नाशिक, पुणे आणि लातूर यांसारख्या शहरांमधून यापूर्वीच काही कनेक्शन समोर आले आहेत. अशा परिस्थितीत शुभम खैरनारची अटक या संपूर्ण कटातील एक मुख्य दुवा ठरू शकते. या प्रकरणाच्या सखोल चौकशीतून येणाऱ्या काळात आणखी काही मोठी नावे समोर येण्याची शक्यता वर्तवली जात आहे.
