Sunjay Kapur Property : दिवंगत उद्योगपती संजय कपूर यांच्या वारसा हक्कावरून मोठा वाद सुरू आहे. या वादात त्यांची पत्नी प्रिया कपूर या केंद्रस्थानी आल्या आहेत. संजय कपूर आणि त्यांच्या माजी पत्नी अभिनेत्री करिश्मा कपूर यांची दोन मुले, समिरा आणि कियान, यांनी कोर्टात 'विल'ची मूळ प्रत तपासण्याची (Inspection) मागणी केली आहे. मात्र, प्रिया कपूर यांनी या मागणीला विरोध केल्यामुळे, हे 'विल' खरे आहे की नाही ? असा प्रश्न उपस्थित झाला आहे.
संजय कपूर यांनी 21 मार्च, 2025 रोजी तयार केलेले हे 'विल', त्यांची जवळजवळ सगळी वैयक्तिक मालमत्ता फक्त प्रिया कपूर यांना देते, असा दावा आहे. त्यामुळे, अब्जावधी रुपयांच्या या मालमत्तेवरून कुटुंबात सुरू असलेला वाद आता दिल्ली उच्च न्यायालयात पोहोचला आहे. न्यायालयानेही प्रिया कपूर यांच्या विरोधाबद्दल प्रश्न विचारला आहे.
मूळ 'विल' तपासण्यास विरोध
11 नोव्हेंबर रोजी समिरा आणि कियान यांनी कोर्टाच्या निबंधकांसमोर (Joint Registrar) मूळ 'विल'ची पाहणी करण्याची औपचारिक मागणी केली. परंतु, प्रिया कपूर आणि या 'विल'चे सह-कार्यकारी श्रद्धा सुरी मारवाह यांनी या तपासणीला विरोध केला.
( नक्की वाचा : Sunjay Kapur property: प्रिया कपूर 'सिंड्रेलाच्या सावत्र आई'सारखी, करिश्माच्या मुलांनी कोर्टात केले नवे आरोप )
या विरोधामुळे, निबंधकांनी प्रिया कपूर आणि श्रद्धा सुरी मारवाह यांना तीन आठवड्यांत कोर्टात आपले म्हणणे मांडण्यास सांगितले. त्यानंतर, नोव्हेंबर 14 रोजी झालेल्या सुनावणीत, समिरा-कियान यांच्या वकिलांनी, ज्या कागदपत्रांवर विश्वास ठेवून मालमत्तेवर हक्क सांगितला जात आहे, त्याच कागदपत्रांच्या तपासणीला विरोध का? असा थेट प्रश्न विचारला.
फॉरेन्सिक तपासणी का महत्त्वाची?
कायदेतज्ज्ञांनी दिलेल्या माहितीनुसार, ज्या व्यक्तीला 'विल'मुळे मोठा फायदा होणार आहे, तिनेच मूळ कागदपत्र तपासणीसाठी न देणे, हे खूप मोठे धोक्याचे चिन्ह (Red Flag) आहे. समिरा आणि कियान यांचा दावा आहे की, प्रिया कपूर यांनी सादर केलेल्या 'विल'मुळे त्यांना वारसा हक्कातून पूर्णपणे बाजूला काढले आहे. तसेच, प्रिया यांना संजय कपूर यांच्या मालमत्ता आणि कंपन्यांवर पूर्ण नियंत्रण मिळते.
( नक्की वाचा : Sunjay Kapur: संजय कपूर यांच्या मृत्युपत्रातील She आणि Her चा अर्थ काय? करिश्मा कपूरच्या मुलांचा मोठा आक्षेप )
हे 'विल' संजय कपूर यांच्या मृत्यूच्या फक्त काही महिने आधी केले गेले असल्याचा दावा आहे. या 'विल'मध्ये काही गोष्टी जुळत नाहीत आणि ते बनावट असू शकते, असा समिरा-कियान यांचा संशय आहे.
या आरोपांमुळे, मूळ 'विल'च्या फॉरेन्सिक तपासणीला नकार देणे, हे पुरावे समोर येण्यापासून रोखण्यासाठी केलेली एक चाल असू शकते, असे मानले जात आहे.
कोर्टाचे नियम आणि शिक्षेचा धोका
जेव्हा 'विल' खरे आहे की नाही यावर प्रश्नचिन्ह उभे राहते, तेव्हा मूळ कागदपत्र कोर्टात सादर करणे खूप महत्त्वाचे आहे, असे भारतीय न्यायालयांनी यापूर्वीच स्पष्ट केले आहे. जर 'विल'मध्ये विसंगती आढळल्या, तर ते अवैध ठरवले जाऊ शकते. याव्यतिरिक्त, जाणूनबुजून खोटे 'विल' तयार करणे किंवा सादर करणे हा एक गुन्हा आहे आणि यासाठी शिक्षा होऊ शकते. यापूर्वी, एका एअर फोर्स अधिकाऱ्याच्या मालमत्तेच्या प्रकरणात, बनावट 'विल' वापरून मालमत्ता हडपल्याबद्दल 2 लोकांना अटक झाली होती.
