Bangalore Entrepreneur Couple Ashwin Aparna Viral Post: भारताची सिलिकॉन व्हॅली म्हणून ओळखले जाणारे शहर म्हणजे बेंगळुरु... देशामध्ये सर्वाधिक आर्थिक उलाढाल होणारे, महागड्या लाईफस्टाईलसाठी बेंगळुरु शहराची चर्चा होते. मात्र सध्या बेंगळुरु शहराबाबत सोशल मीडियावर व्हायरल होत असलेली एक पोस्ट चांगलीच चर्चेत आली आहे. अश्विन आणि अपर्णा या बेंगळुरुमध्ये राहणाऱ्या जोडप्याने शहर सोडण्याचा निर्णय घेतला आहे. दोन वर्ष राहिल्यानंतर हे शहर हळूहळू मारत आहे अशी खळबळजनक पोस्ट करत त्यांनी या निर्णयामागची कारणेही स्पष्ट केली आहेत.
"बेंगळुरू हळूहळू मारत आहे... (Bengaluru Couple Post)
अश्विन आणि अपर्णा, दोघेही 27 वर्षांचे आहेत, कॉर्पोरेटमध्ये काम करतात आणि स्वतःचे व्यवसाय चालवतात. "तुम्ही आमचा द्वेष करू शकता, पण बेंगळुरू (Bengaluru) हळूहळू आपल्याला मारत आहे" अशा वाक्याने सुरू झालेल्या त्यांच्या व्हायरल व्हिडिओमध्ये, या जोडप्याने शहर सोडण्याच्या त्यांच्या निर्णयामागील कारण स्पष्ट केले. त्यांनी सांगितले की त्यांना बेंगळुरूचे हवामान, त्याचे वातावरण आणि लोक खूप आवडतात. पण काही काळानंतर, त्यांना असे वाटू लागले की ते वारंवार आजारी पडत आहेत.
या व्हिडिओमध्ये अश्विन सांगतो की आम्ही आजारी पडायला सुरुवात झाली. मला श्वास घेण्यास त्रास होत होता आणि अॅलर्जी होत होती. तर अपर्णा म्हणते की, मी जिला कधीही सर्दी झाली नव्हती, ती नेहमीच खोकत आणि शिंकत होती. या जोडप्याने त्यांच्या जीवनशैलीत बदल करण्याचा प्रयत्न केला, जसे की निरोगी खाणे आणि दररोज व्यायाम करणे. पण शेवटी त्यांना कळले की त्यांच्या समस्यांचे मूळ बेंगळुरूमधील हवेची गुणवत्ता आहे.
खराब हवेच्या गुणवत्तेमुळे (Poor Air Pollution) या जोडप्याने बेंगळुरू सोडून हिरव्या आणि स्वच्छ ठिकाणी जाण्याचा निर्णय घेतला. "आमचे बेंगळुरू अद्भुत आहे. व्यवसाय सुरू करण्यासाठी ते सर्वोत्तम ठिकाण देखील आहे, परंतु आम्हाला शक्य तितक्या लवकर हा निर्णय घ्यावा लागला. शहराने आम्हाला पूर्णपणे संपवण्याआधी आम्ही बेंगळुरू सोडले.आमच्या नोकऱ्या आणि मित्र येथे आहेत, परंतु आम्हाला आमच्या आरोग्याला (Health Problem) प्राधान्य द्यावे लागेल, असंही ते या व्हिडिओमध्ये म्हणत आहेत.
या जोडप्याचा हा व्हिडिओ सोशल मीडियावर तुफान व्हायरल होत आहे. ज्याला जवळजवळ 10 लाख व्ह्यूज मिळाले आहेत. या व्हिडिओवर नेटकऱ्यांनी संमिक्ष प्रतिक्रिया दिल्या आहेत. काही जणांनी तुम्ही निघून जा, इथे कामासाठी लोकांनी गर्दी करण्याआधी हे शहर सुरक्षित होते असं म्हटलं आहे. तसेच प्रत्येकाने बेंगळुरू सोडा. जेणेकरून येथे आधीच राहणारे लोक शांततेत राहू शकतील आणि ताजी हवा परत मिळवू शकतील, असंही काही नेटकऱ्यांनी म्हटलं आहे.
