Delhi Vivek Vihar Fire: दिल्ली-एनसीआरमधील उंच इमारतींना आग लागण्याच्या घटनांमध्ये सातत्याने वाढ होत असल्याचे दिसते. अलीकडेच, गाझियाबादमधील गौर ग्रीन अपार्टमेंटमध्ये भीषण आग लागून कोट्यवधी रुपयांची घरे जळून खाक झाली. आता दिल्लीच्या विवेक विहार भागातील एका फ्लॅटला भीषण आग लागली आहे. या भीषण आगीत नऊ जणांचा मृत्यू झाला आहे. मृतदेह इतके जळाले होते की, त्यात पुरुष आणि महिलांचा फरक ओळखणेही शक्य नव्हते.
दिल्लीत भीषण अग्नितांडव, ९ जणांचा मृत्यू
समोर आलेल्या माहितीनुसार, ही भीषण घटना शाहदरा जिल्ह्यातील विवेक विहारच्या बी ब्लॉकमधील चार मजली इमारतीच्या सर्वात वरच्या मजल्यावर पहाटे ३:०० च्या सुमारास घडली. इमारतीत नऊ जणांचा मृत्यू झाल्याचे वृत्त आहे. वरून खाली आलेल्या स्थानिक नगरसेवक पंकज लुथरा यांनी सांगितले की, मृतदेह इतके जळाले होते की त्यात पुरुष आणि महिलांचा फरक ओळखणे अशक्य होते.
आग एका अपार्टमेंटमध्ये लागली आणि ती झपाट्याने इतर भागांमध्ये पसरली. धूर आणि आगीच्या ज्वाळांमुळे आत अडकलेल्या लोकांना बाहेर पडणे कठीण झाले होते. तसेच ही आग एसीच्या स्फोटामुळे लागल्याचे सांगण्यात येत आहे. दुर्घटनेत १२ जणांना वाचवण्यात आले आहे. मात्र, काही जण अजूनही बेपत्ता आहेत. फॉरेन्सिक पथके आणि अग्निशमन दलाचे अधिकारी आगीच्या कारणाचा तपास करत आहेत.
इमारतीमधील सुरक्षा व्यवस्थेचीही चौकशी सुरू आहे. स्थानिकांच्या मते, आग लागताच परिसरात घबराट पसरली. लोकांनी बचावकार्यात मदत करण्यासाठी स्वयंसेवा करण्याचा प्रयत्न केला, परंतु आगीची तीव्रता आणि धुरामुळे परिस्थिती आव्हानात्मक बनली होती. प्रशासनाने सध्या सांगितले आहे की, बचावकार्य पूर्ण झाल्यावरच मृतांचा नेमका आकडा कळेल.
Track Latest News Live on Marathi.NDTV.com and get news updates from India and around the world
