From Young IPS Officer to Dismissed Official: अवघ्या 24 व्या वर्षी आयपीएस बनून पोलीस दलात धमाकेदार एन्ट्री करणाऱ्या अधिकाऱ्याची कारकीर्द आता पूर्णपणे रसातळाला गेली आहे. भ्रष्टाचाराच्या आरोपाखाली नोकरी गमावल्यानंतर आता त्यांच्यावर उत्पन्नापेक्षा अधिक संपत्ती जमवल्याचा नवा गुन्हा दाखल झाला आहे. सरकारी तिजोरीतून मिळणाऱ्या पगारापेक्षा लाखो रुपये अधिक खर्च केल्याचा ठपका ठेवत तपास यंत्रणांनी त्यांच्याविरुद्ध कारवाईचा फास अधिक आवळला आहे.
काय आहे प्रकरण?
उत्तर प्रदेश केडरचे हे बडतर्फ अधिकारी मणिलाल पाटीदार सध्या महोबा येथील व्यापारी इंद्रकांत त्रिपाठी यांच्या मृत्यू प्रकरणामुळे चर्चेत आले होते. उत्तर प्रदेश विजिलन्स विभागाने केलेल्या सखोल चौकशीत पाटीदार यांच्या आर्थिक व्यवहारांमधील मोठी तफावत समोर आली आहे. कानपूर सेक्टरचे विजिलन्स इन्स्पेक्टर मुरलीधर पांडेय यांनी दिलेल्या तक्रारीनुसार, पाटीदारने त्यांच्या अधिकृत कमाईपेक्षा सुमारे 9.75 लाख रुपये जास्त खर्च केले आहेत. हा खर्च त्यांच्या ज्ञात उत्पन्नापेक्षा कितीतरी पटीने जास्त असल्याने त्याच्यावर भ्रष्टाचार प्रतिबंधक कायद्यान्वये गुन्हा नोंदवण्यात आला आहे.
( नक्की वाचा : Dalda Story : भारतीय किचनवर 90% ताबा असणारा डालडा अचानक गायब का झाला? 'ब्रँड' ते 'बॅड' प्रवासाचं कारण काय? )
तपासादरम्यान समोर आलेल्या आकडेवारीनुसार, मणिलाल पाटीदारने लोकसेवक म्हणून काम करताना एकूण 43.19 लाख रुपये कमावले होते. मात्र, याच काळात त्यांचा प्रत्यक्ष खर्च 52.95 लाख रुपये इतका झाला आहे. उत्पन्नाच्या तुलनेत झालेला हा अतिरिक्त खर्च म्हणजे बेकायदेशीर मार्गाने जमवलेली संपत्ती असल्याचे मानले जात आहे. या नवीन एफआयआरमुळे पाटीदार यांच्या अडचणीत आता मोठी वाढ झाली असून त्यांची उरलीसुरली संपत्तीही जप्त होण्याची शक्यता निर्माण झाली आहे.
दीर्घकाळ फरार
इंद्रकांत त्रिपाठी यांनी 2020 मध्ये सोशल मीडियावर एक व्हिडिओ पोस्ट करून पाटीदार यांच्यावर 6 लाख रुपयांची लाच मागितल्याचा आरोप केला होता. या व्हिडिओनंतर त्रिपाठी यांचा संशयास्पद मृत्यू झाला, ज्यामध्ये पाटीदार यांचे नाव मुख्य आरोपी म्हणून समोर आले होते. या प्रकरणानंतर ते दीर्घकाळ फरार होते आणि त्यांच्यावर 1 लाख रुपयांचे बक्षीसही जाहीर करण्यात आले होते. अखेर त्याने 2022 मध्ये शरणागती पत्करली आणि जून 2023 मध्ये त्याला पोलीस सेवेतून कायमचे बडतर्फ करण्यात आले.
