Gwalior tension: मध्यप्रदेशातील ग्वाल्हेर शहरात सध्या उच्च न्यायालयाच्या परिसरात डॉ. बाबासाहेब आंबेडकर यांच्या पुतळ्याच्या स्थापनेवरून सुरू असलेल्या तणावामुळे वातावरण ढवळून निघाले आहे. या तणावाच्या काळात, फूलबाग परिसरात एक अत्यंत अनपेक्षित घटना घडली, ज्यामुळे प्रशासकीय आदेशांचे पालन करण्यासाठी तैनात असलेल्या एका पोलीस अधिकाऱ्याच्या कृतीबद्दल संपूर्ण शहरात चर्चा सुरू झाली. एका धार्मिक कार्यक्रमासाठी जमलेल्या जमावाला थांबवण्यासाठी गेलेल्या सीएसपी हिना खान यांनी अचानक जोरदारपणे 'जय श्री राम' च्या घोषणा दिल्या!
पोलीस अधिकारी, तेही एका विशिष्ट धर्माच्या घोषणा देत असल्याचे पाहून अनेकांना धक्का बसला. प्रशासकीय कर्तव्य पार पाडत असताना एका सीएसपीने अशी घोषणा का दिली? या प्रश्नाने ग्वाल्हेरमधील ही घटना राष्ट्रीय स्तरावर चर्चेचा विषय ठरली आहे.
काय आहे कारण?
सीएसपी हिना खान आणि बार असोसिएशनचे माजी अध्यक्ष ॲडव्होकेट अनिल मिश्रा यांच्यात हा संघर्ष सुरू झाला. ॲडव्होकेट मिश्रा आपल्या समर्थकांसह फूलबाग येथे 'सुंदरकांड'चे पठण करण्यासाठी पोहोचले होते. शहरात 'भारतीय न्याय संहिता'च्या कलम 163 (पूर्वीची कलम 144) अंतर्गत जमावबंदी लागू असल्यामुळे आणि सुमारे 4,000 पोलीस कर्मचाऱ्यांची तैनाती असताना, सीएसपी खान यांनी मिश्रा यांना थांबवले.
( नक्की वाचा : Video: 'नवरा दारु पितो, दुसऱ्या मुलींशी बोलतो आणि सासरा...', विवाहित महिलेनं रडत-रडत उचललं टोकाचं पाऊल )
प्रशासकीय आदेशाचे पालन करण्यास सांगताच संतप्त झालेल्या ॲडव्होकेट मिश्रा यांनी सीएसपी हिना खान यांना 'तुम्ही सनातन धर्माच्या विरोधात आहात' असे म्हणत "जय श्री राम" च्या घोषणा देण्यास सुरुवात केली.
या आरोपाला आणि घोषणाबाजीला उत्तर देण्यासाठी, तसेच ॲडव्होकेट मिश्रा यांना कायद्याचे पालन करण्यास भाग पाडण्यासाठी सीएसपी हिना खान यांनी अत्यंत धाडसाने पाऊल उचलले. त्यांनी पुढे येऊन, मिश्रा यांच्या डोळ्यात डोळे घालून स्वतः चार वेळा "जय श्री राम" च्या घोषणा दिल्या आणि "आणखी काय?" असे विचारले. एका पोलीस अधिकाऱ्याने दिलेल्या या 'जशास तसे' उत्तरामुळे मिश्रा समर्थक क्षणभर गोंधळले, पण त्यानंतर त्यांनी आणखी जोरात घोषणाबाजी सुरू केली.
शहरात संचारबंदीसारखी परिस्थिती
ॲडव्होकेट मिश्रा यांनी यापूर्वी सीएसपी खान यांच्यावर 'धर्म अपमानित' केल्याचा आरोप केला होता. त्यावर त्यांनी 'हा धर्माचा नाही, तर प्रशासनाचा आदेश आहे' असे स्पष्ट उत्तर दिले होते. बाबासाहेबांच्या पुतळ्यावरून सुरू असलेल्या वादामुळे ग्वाल्हेरमध्ये सध्या संचारबंदीसारखी परिस्थिती आहे.
तणाव वाढण्यास कारणीभूत ठरलेल्या ॲडव्होकेट अनिल मिश्रा यांच्या कथित वादग्रस्त व्हिडिओमुळे त्यांच्याविरोधात ग्वाल्हेर आणि महाराष्ट्रात एफआयआर (FIR) दाखल आहे.
प्रशासकीय पातळीवर कलेक्टर रुचिका चौहान आणि आयजी अरविंद सक्सेना यांनी माहिती दिली की, 260 हून अधिक आक्षेपार्ह सोशल मीडिया पोस्ट्स काढून टाकण्यात आल्या आहेत. त्याचबरोबर संवेदनशील भागांमध्ये 700 अतिरिक्त सुरक्षा कर्मचारी तैनात आहेत. एसएसपी धर्मवीर सिंह यांच्या नेतृत्वाखाली रात्री फ्लॅग मार्च काढण्यात आला होता.
इथे पाहा Video
