NEET Paper Leak : देशातील तब्बल 23 लाख विद्यार्थ्यांच्या भविष्याशी खेळणाऱ्या नीट (NEET) परीक्षा पेपरफुटी प्रकरणाचे धागेदोरे उलगडण्यास सुरुवात झाली आहे. केंद्रीय अन्वेषण विभागाने म्हणजेच सीबीआयने या संपूर्ण रॅकेटच्या मुख्य सुत्रधाराला बेड्या ठोकल्या आहेत. वैद्यकीय प्रवेश परीक्षेचा पेपर नेमका कुठून आणि कसा फुटला, याचा शोध घेणाऱ्या सीबीआयला तपासात सर्वात मोठे यश आले आहे. या संपूर्ण घोटाळ्याचा मास्टरमाईंड दुसरा कोणी नसून लातूरमधील एक रसायनशास्त्राचा (केमिस्ट्री) प्रोफेसर असल्याचे समोर आल्याने शिक्षण क्षेत्रात प्रचंड खळबळ उडाली आहे.
कोण आहे हा मास्टरमाईंड पीव्ही कुलकर्णी?
सीबीआयने अटक केलेल्या या मुख्य सुत्रधाराचे नाव पीव्ही कुलकर्णी असे आहे. पीव्ही कुलकर्णी हा मूळचा महाराष्ट्रातील लातूर येथील रहिवासी असून तो केमिस्ट्रीचा प्रोफेसर आहे. नॅशनल टेस्टिंग एजन्सी म्हणजेच एनटीएच्या वतीने परीक्षा प्रक्रियेत त्याचा थेट सहभाग होता. याच अधिकृत पदाचा आणि ओळखीचा गैरफायदा घेत कुलकर्णीने नीट परीक्षेच्या पेपरपर्यंत थेट प्रवेश मिळवला. अत्यंत गोपनीय असलेली प्रश्नपत्रिका त्याच्या हाती लागताच त्याने ती लीक केली आणि विद्यार्थ्यांच्या भविष्याचा बाजार मांडला.
पुण्यातील कोचिंग क्लासमध्ये झाला होता पेपर लीक
केमिस्ट्रीचा प्राध्यापक असलेला पीव्ही कुलकर्णी हा स्वतःचे खाजगी क्लासेसही चालवायचा. लातूरमधल्या त्याच्या राहत्या घरी तो 'राज कोचिंग क्लासेस' या नावाने खाजगी वर्ग घेत असे. नीट परीक्षा होण्यापूर्वी, म्हणजेच एप्रिल महिन्याच्या शेवटच्या आठवड्यात त्याने घरी विद्यार्थ्यांसाठी एक विशेष क्लास घेतला होता. या क्लास दरम्यान त्याने विद्यार्थ्यांना काही प्रश्न, त्यांचे पर्याय आणि थेट त्यांची उत्तरे लिहून दिली होती. विद्यार्थ्यांनी देखील हे सर्व प्रश्न आपल्या वहीत लिहून घेतले होते.
( नक्की वाचा : NEET चे पेपर लाखो रुपयांत कसे विकले? परीक्षेपूर्वीच कशी फुटली प्रश्नपत्रिका? वाचा Exclusive गौप्यस्फोट )
कसे उघड झाले गुपित?
3 मे रोजी नीटची परीक्षा पार पडल्यानंतर सीबीआयने या प्रकरणाचा तपास करताना विद्यार्थ्यांच्या वह्या जप्त केल्या. या वह्यांमध्ये पीव्ही कुलकर्णी याने एप्रिलच्या शेवटी लिहून दिलेले प्रश्न आणि प्रत्यक्ष परीक्षेत आलेली प्रश्नपत्रिका यांची जेव्हा समोरासमोर पडताळणी करण्यात आली, तेव्हा सीबीआयचे अधिकारीही चक्रावून गेले. वह्यांमधील प्रश्न आणि परीक्षेतील प्रश्न जसेच्या तसे मॅच झाले होते. यावरूनच सीबीआयला खात्री पटली की पेपरफुटीचा मुख्य स्त्रोत हा परीक्षा प्रक्रियेत थेट सामील असलेला पीव्ही कुलकर्णी हाच आहे. त्यानंतर सीबीआयने त्याला तातडीने ताब्यात घेतले.
ब्युटी पार्लर चालवणाऱ्या मनीषा वाघमारेचे कनेक्शन
या प्रकरणात पीव्ही कुलकर्णी याच्यासोबत काम करणाऱ्या मनीषा वाघमारे नावाच्या महिलेला सीबीआयने गुरुवारीच अटक केली होती. मनीषा वाघमारे ही एक ब्युटी पार्लर चालवते. ती ब्युटी पार्लर चालक असली तरी ती या रॅकेटमध्ये एजंट म्हणून काम करत होती. मेडिकल कॉलेजमध्ये प्रवेश मिळवून देण्याचे आणि लीक झालेला पेपर देण्याचे आमिष दाखवून ती विद्यार्थ्यांना आपल्या जाळ्यात ओढायची. यासाठी ती प्रत्येक विद्यार्थ्याकडून लाखो रुपये उकळायची आणि त्यानंतर या विद्यार्थ्यांना थेट पीव्ही कुलकर्णी याच्याकडे पाठवायची.
( नक्की वाचा : NEET Paper Leak: बाप आरोपी अन् घरात 5-5 डॉक्टर; नीट पेपर लीक प्रकरणातील 'या' कुटुंबाचं धक्कादायक वास्तव )
देशभर छापे
या संपूर्ण प्रकरणात सीबीआयने आतापर्यंत देशातील विविध भागांतून एकूण 8 लोकांना अटक केली आहे. यामध्ये जयपूर, गुरुग्राम, नाशिक, पुणे आणि अहिल्यानगर (अहमदनगर) येथील आरोपींचा समावेश आहे. अटक करण्यात आलेल्या आरोपींपैकी 5 जणांना गुरुवारी न्यायालयात हजर करण्यात आले असून त्यांना 7 दिवसांची पोलीस कोठडी सुनावण्यात आली आहे.
गेल्या 24 तासांत सीबीआयने देशभरात अनेक ठिकाणी मोठे छापे टाकले आहेत. या कारवाई दरम्यान अनेक महत्त्वाची कागदपत्रे, इलेक्ट्रॉनिक उपकरणे आणि मोबाईल फोन जप्त करण्यात आले आहेत. या सर्व उपकरणांचे फॉरेन्सिक विश्लेषण केले जात असून, या पेपरफुटीचे जाळे देशात इतर कुठल्या राज्यांमध्ये पसरले आहे का, याचा शोध आता सीबीआय घेत आहे. केंद्रीय शिक्षण मंत्रालयाच्या उच्च शिक्षण विभागाकडून तक्रार मिळाल्यानंतर मंगळवारी सीबीआयने या प्रकरणी गुन्हा दाखल केला होता आणि अवघ्या काही दिवसांतच या मोठ्या रॅकेटचा पर्दाफाश केला आहे.
