Ola Electric ला केंद्र सरकारने धाडली नोटीस, Scooter ग्राहकांच्या तक्रारींची घेतली गंभीर दखल

ओला इलेक्ट्रिकविरोधातील रोषामुळे इलेक्ट्रिक स्कूटर बाजारात बजाज ऑटो आणि एथर एनर्जीने मुसंडी मारली आहे.

ओला इलेक्ट्रिक कंपनीच्या स्कूटरसंदर्भात असंख्य ग्राहकांनी तक्रारी केल्या आहेत. यामुळे केंद्र सरकारने ओला इलेक्ट्रिक कंपनीला कारणे दाखवा नोटीस बजावली आहे.

गेल्या वर्षभरात हेल्पलाइन क्रमांकावरून 10 हजारांपेक्षा अधिक ग्राहकांनी तक्रार नोंदवल्या आहेत.
ग्राहक संरक्षण कायद्याचे उल्लंघन केल्याचा ठपका ठेवत कंपनीचे संस्थापक भाविश अग्रवाल आणि त्यांची कंपनी ओला इलेक्ट्रिकला नोटीस बजावली आहे.
स्कूटरची डिलिव्हरी उशीरा मिळणे, सुमार दर्जाची सेवा, आश्वासन दिलेल्या सेवांची पूर्तता न करणे, सदोष उत्पादने, ज्यादा किंमत आकारणे आणि स्कूटरमध्ये खराब दर्जाचे भाग वापरल्याचा ग्राहकांनी आरोप सातत्याने केला आहे.

ओला इलेक्ट्रिकच्या सर्व्हिस सेंटरबाहेर नादुरुस्त झालेल्या असंख्य स्कूटर धूळखात पडलेल्या आहेत. त्या दुरुस्त केल्या जास्त नसल्याने आणि सतत बिघडत असल्याने ग्राहक भयंकर त्रासलेले आहेत.
कंपनीने यावर तोडगा म्हणून देशभरातील 1 लाख मेकॅनिकना ओलाच्या स्कूटर दुरुस्त करण्याचे प्रशिक्षण देण्याची योजना आखली आहे.