साताऱ्यातील गुलमोहर रंगोत्सवाची 25 वर्षांची परंपरा, 1 मे रोजी का साजरा गुलमोहर दिन?

राज्यभरात 1 मे हा महाराष्ट्र दिन आणि कामगार दिन म्हणून साजरा केला जातो. पण साताऱ्यामध्ये 1 मे 'गुलमोहर दिन' म्हणून गेल्या 25 वर्षांपासून साजरा केला जातो आहे. गुलमोहर दिन म्हणजे चित्रकला, कविता, लेखन, संगीत तसेच कला आविष्कारांचा संगम साताऱ्यामध्ये पाहायला मिळतो.

देशाच्या वेगवेगळ्या भागातून कलाकार या महोत्सवामध्ये सहभाग नोंदवतात. रखरखत्या उन्हाळ्यामध्ये रस्त्याच्या कडेला लाल, पिवळा गुलमोहर, बहावा वृक्ष फुललेला पाहून मनाला गारवा मिळतो.

कडक उन्हामुळे जेथे झाडे, रोप करपतात तेथे गुलमोहराचे झाड बहरून लोकांचे लक्ष वेधून घेते. ही बाब लक्षात घेऊन साताऱ्यातील काही पर्यावरण प्रेमींनी 1 मे हा दिवस गुलमोहर दिन म्हणून साजरा करायला सुरुवात केली आणि यंदाचे गुलमोहर रंगोत्सवाचे 26वे वर्ष आहे.

लहानांपासून थोरांपर्यंत सर्वजण साताऱ्यामध्ये एकत्रित येऊन गुलमोहराच्या झाडाचे, त्याच्या फुलांचे सुंदर-सुंदर चित्र रेखाटतात. सर्वच जण मिळून गाणी गायतात-कविता म्हणतात.

आजच्या महोत्सवामध्येही सर्वांनी चित्रे रेखाटली, चारोळ्या सादर केल्या आणि एकमेकांना गुलमोहर दिनाच्या शुभेच्छा देखील दिल्या.

गुलमोहर रंगोत्सव आता अधिक बहरू लागला आहे. कारण राज्यातील कलाकार देखील या कार्यक्रमामध्ये सहभागी होत आहेत.

विशेष म्हणजे एकही कलाकार आपली कला सादर करताना कोणत्याही प्रकारचे मानधन घेत नाहीत.