संजय राऊतांवर महाराष्ट्रातील काँग्रेस नेते नाराज का?

महाविकास आघाडीमध्ये जागा वाटप निश्चित होण्यापूर्वीच शिवसेनं 17 उमेदवारांची घोषणा केली. शिवसेनेच्या या निर्णयाचे मविआमध्ये पडसाद उमटले आहेत. विशेषत: काँग्रेस पक्षाचा दावा असलेल्या जागांवर शिवसेनेनं उमेदवार जाहीर केले आहेत. त्यामुळे महाराष्ट्रातील काँग्रेस नेते नाराज आहेत. महायुतीचे शिल्पकार संजय राऊत यांच्यावर त्यांची नाराजी असल्याचं मानलं जातंय.

शिवसेनेनं जाहीर केलेल्या 17 जागांमध्ये पश्चिम महाराष्ट्रातील सांगली आणि मुंबईतील चार जागांचा समावेश आहे.

सांगली ही काँग्रेसची पारंपारिक जागा आहे. या जागेसाठी काँग्रेस आग्रही असताना शिवसेनेनं चंद्रहार पाटील यांना उमेदवारी दिलीय. ( फोटो सौजन्य : @ShivSenaUBT_)
वायव्य मुंबईतून काँग्रेस नेते संजय निरुपम निवडणूक लढवण्यासाठी उत्सुक आहेत. या मतदारसंघातून शिवसेनेनं अमोल किर्तीकर यांना उमेदवारी दिलीय. (फोटो सौजन्य : @AmolGKirtikar)
काँग्रेसचा जोर असलेल्या दक्षिण मध्य मुंबईतून अनिल देसाई यांना पक्षानं निवडणुकीच्या रिंगणात उतरवलं आहे. ( फोटो सौजन्य : @ianildesai )

शिवसेनेनं मुंबईतील उमेदवार जाहीर करताच संजय निरुपम आक्रमक झाले आहेत. महाराष्ट्रातील काँग्रेस संजय राऊत यांच्या दावणीला बांधली असल्याची टीका निरुपम यांनी केलीय.
दिल्लीतील काँग्रेस हायकमांड संजय राऊत यांच्या कलानं कारभार करत असल्याचा राज्यातील काँग्रेस नेत्यांचा आक्षेप आहे. (फोटो सौजन्य : @bharatjodo)
संजय राऊत हे महाविकास आघाडीचे शिल्पकार मानले जातात. पण, आता हेच राऊत जागा वाटपातील व्हिलन ठरत असल्याची चर्चा आहे.