Global News | छठपूजेमुळे रेल्वे स्थानकांवर प्रवाशांची गर्दी, Bihar-UP कडे जाणाऱ्या गाड्या फुल्ल
छठ पूजेनंतर आता देशभरातील रेल्वे स्थानकांवर प्रवाशांची प्रचंड गर्दी वाढली आहे. विशेषतः बिहार आणि उत्तर प्रदेशकडे जाणाऱ्या गाड्यांमध्ये आपल्या गावी परतणाऱ्या प्रवाशांची संख्या मोठ्या प्रमाणात दिसून येत आहे. सणासुदीच्या काळात वाढणारी प्रवाशांची गर्दी लक्षात घेऊन रेल्वे प्रशासनाने विशेष उपाययोजना केल्या आहेत. प्रवाशांच्या सोयीसाठी विशेष गाड्या चालवण्यात येत असून, रेल्वे स्थानकांवरील सुरक्षा व्यवस्थाही अधिक कडक करण्यात आली आहे. तसेच गर्दी नियंत्रणासाठी आवश्यक ती पावले उचलली जात आहेत. उत्तर मध्य रेल्वेने वाढत्या गर्दीच्या पार्श्वभूमीवर नोव्हेंबर महिन्यात सुमारे ५० विशेष गाड्या चालवण्याचा निर्णय घेतला आहे. या गाड्या १ ते ३० नोव्हेंबरदरम्यान विविध मार्गांवर धावणार असून, त्या एकूण १,१०० हून अधिक फेऱ्या पूर्ण करतील. पश्चिम रेल्वेनेही उत्तर प्रदेश, बिहार, पश्चिम बंगाल आणि झारखंडकडे जाणाऱ्या प्रवाशांसाठी अतिरिक्त विशेष गाड्या सुरू केल्या आहेत. गर्दी नियंत्रणासाठी प्रमुख रेल्वे स्थानकांवर विशेष ‘प्रवासी प्रतीक्षा क्षेत्र’ तयार करण्यात आले आहेत, जेणेकरून प्लॅटफॉर्मवर अनावश्यक गर्दी होणार नाही.
