Most Expensive Teas In India: भारत हा जगातील मोठ्या चहा उत्पादक देशांपैकी एक आहे. भारत केवळ चहा उत्पादनासाठीच नव्हेतर त्याची गुणवत्ता आणि दुर्मिळ वैशिष्ट्यांसाठी ओळखला जातो. दार्जिलिंग, आसाम आणि निलगिरीसारख्या प्रदेशांमध्ये पिकवल्या जाणाऱ्या काही चहांना सर्वात महागडा चहा म्हणून ओळखली जाते. याची किंमत लाखोंमध्ये आहे. मर्यादित उत्पादन, अद्वितीय हवामान आणि पारंपारिकतेची जोड यामुळेच हे चहा जगात खास आहेत.
'चहाचा शैम्पेन': दार्जिलिंग फर्स्ट फ्लश | Darjeeling First Flush - The Jewel of Tea World
चहाप्रेमी ज्याला 'चहाचा शैम्पेन' म्हणतात, तो म्हणजे दार्जिलिंगचा 'फर्स्ट फ्लश'. थंडी संपल्यावर जेव्हा पहिली ताजी पालवी येते, तेव्हाच ही चहाची पाने खुडली जातात. त्यामुळेच याला एक हलका, फुलांसारखा आणि अतिशय नाजूक स्वाद मिळतो. हा चहा खूप कमी कालावधीसाठी उपलब्ध असतो, ज्यामुळे जगभरातील श्रीमंत ग्राहक याची वाट बघत असतात. यामुळेच, १०० ग्रॅमच्या पॅकेटसाठी ८०० ते ८,००० रुपयांपर्यंत किंमत देणे सामान्य आहे.
आसामचा 'सोनेरी' चहा: मनोहारी गोल्ड| (Manohari Gold Tea from Assam)
आसाममधील 'मनोहारी गोल्ड टी'च्या नावाप्रमाणेच ही चहाची पाने सोन्यासारखी चमकतात. याची उत्पादन प्रक्रिया खूपच खास आहे. फक्त विशिष्ट आणि निवडक पानेच हाताने तोडली जातात, त्यामुळे उत्पादन खूपच मर्यादित असते. याच दुर्मीळतेमुळे २०२२ मध्ये या चहाचा लिलाव तब्बल १.१५ लाख रुपये प्रति किलो दराने झाला होता. हा आकडा भारतातील चहाच्या इतिहासातील सर्वात मोठा विक्रम आहे, ज्यामुळे आसामच्या चहाला जगभरात ओळख मिळाली.
पौर्णिमेची भेट: सिल्वर टिप्स इम्पीरियल| (Silver Tips Imperial – Picked on Full Moon Nights)
दार्जिलिंगच्या माकाइबारी इस्टेटमध्ये तयार होणारा 'सिल्वर टिप्स इम्पीरियल' हा चहा तर एखाद्या कथेतील भाग वाटावा असा आहे. याच्या उत्पादकांचा दावा आहे की, ही पाने फक्त पौर्णिमेच्या रात्रीच तोडली जातात. अत्यंत पारंपरिक आणि जतन केलेल्या पद्धतीने याचे उत्पादन केले जाते. यामुळे याची ५० ग्रॅमची किंमत जवळपास १,९५० इतकी आहे.
'गोल्डन नीडल टी' | (Golden Needle and Vintage Estate Teas)
याव्यतिरिक्त, नॉर्थ-ईस्टकडील 'गोल्डन नीडल टी' (जी ४०,००० प्रति किलो दराने विकली गेली आहे) आणि 'नीलगिरी फ्रॉस्ट टी' यांसारखे चहाचे प्रकारही त्यांच्या विशिष्ट तुडाईच्या वेळा, हाताने होणारी खास प्रक्रिया आणि अत्यंत मर्यादित साठ्यामुळे विक्रमी किंमत मिळवतात. त्यामुळे, पुढील वेळी जेव्हा तुम्ही चहाचा कप हातात घ्याल, तेव्हा लक्षात ठेवा की, भारतीय चहाची काही पाने खऱ्या अर्थाने सोन्यापेक्षाही मौल्यवान आहेत!
