Goa Nightclub Fire : दिल्लीतील दोन व्यावसायिकांनी नियमांचे उल्लंघन करून गोव्यात नाइट क्लब सुरू केला होता. नाइट क्लबच्या सुरक्षिततेसह इतर व्यवस्थेकडे अक्षम्य दुर्लक्ष करण्यात आलं होतं.6 डिसेंबरच्या रात्री नाइट क्लबमध्ये लागलेल्या आगीत 25 लोकांचा मृत्यू झाला होता. या घटनेचं गांभीर्य लक्षात न घेता क्लबच्या मालकाने गुपचूप भारत सोडून पळ काढला आहे. गोव्यातील ‘बर्च बाय रोमियो लेन' या नाइट क्लबमध्ये आगीची भयंकर घटना घडली होती. या घटनेमुळं एकच खळबळ उडाली आहे. दरम्यान, या क्लबचा मालक भारत सोडून थायलंडला पळून गेला आहे. या प्रकरणाच्या तपासासाठी नियुक्त केलेल्या पथकाने सोमवारी दिल्लीतील क्लब मालकांच्या ठिकाणी छापेमारी केली, तेव्हा ही धक्कादायक माहिती उघडकीस आली.क्लबचे मालक गौरव लुथरा आणि सौरभ लुथरा फरार असून ते अद्यापही सापडले नाहीत.
‘बर्च बाय रोमियो लेन'आगीच्या घटनेची गोवा पोलीस सातत्याने तपासाची सुत्रे फिरवत होती.या प्रकरणी गुन्हा दाखल होताच, पोलिसांची एक टीम तात्काळ दिल्लीला रवाना करण्यात आली,जिथे आरोपी गौरव लुथरा आणि सौरभ लुथरा यांच्या ठिकाणी छापेमारी करण्यात आली. दोघेही तिथे उपस्थित नव्हते, त्यानंतर त्यांच्या निवासस्थानी कायद्यानुसार नोटीस लावण्यात आली.
अपघाताच्या दुसऱ्याच दिवशी मुंबईहून थायलंडला पळ काढला
पोलिसांनी दिलेली माहिती अशी की, 7 डिसेंबरच्या संध्याकाळपर्यंत दोघांविरुद्ध लुकआउट सर्क्युलर (LOC) जारी करण्यात आले होते. मुंबई इमिग्रेशनशी संपर्क साधल्यावर समजले की दोन्ही आरोपी 7 डिसेंबरच्या पहाटे 5:30 वाजता इंडिगोच्या फ्लाइट 6E 1073 ने फुकेतसाठी रवाना झाले होते, तर अपघात मागील रात्री सुमारे मध्यरात्री झाला होता. यावरून स्पष्ट होते की दोघांनी चौकशीपासून बचाव करण्याचा प्रयत्न केला.
गोवा पोलिसांनी CBI च्या इंटरपोल विभागाशी संपर्क साधला
दोन्ही आरोपींना पकडण्यासाठी गोवा पोलिसांनी CBI च्या इंटरपोल विभागाशीही संपर्क साधला आहे, जेणेकरून त्यांची लवकरात लवकर अटक सुनिश्चित करता येईल. दरम्यान, पोलिसांनी दिल्लीहून भारत कोहलीला ताब्यात घेऊन ट्रान्झिट रिमांड मिळवला आहे. त्याला पुढील चौकशीसाठी गोव्यात आणले जात आहे. लक्षात घ्या की या प्रकरणात अंजुना पोलीस ठाण्यात भारतीय न्याय संहिता, 2023 च्या कलम 105, 125, 125(अ), 125(ब), 287 अंतर्गत गुन्हा नोंदवला आहे.
क्लबमध्ये ‘इलेक्ट्रिक फटाके' फोडल्यामुळे आग लागली होती
सर्व मृतांचे पोस्टमार्टेम (PME) पूर्ण झाले असून मृतदेह त्यांच्या नातेवाईकांकडे सुपूर्द करण्यात आले आहेत. गोव्याचे मुख्यमंत्री प्रमोद सावंत यांनी रविवारी सांगितले की ‘बर्च बाय रोमियो लेन' नाइटक्लबमध्ये लागलेल्या आगीच्या घटनेनंतर क्लबमधील चार कर्मचाऱ्यांना अटक करण्यात आली आहे. प्राथमिक चौकशीत उघडकीस आले की, आत ‘इलेक्ट्रिक फटाके' फोडले गेले होते, ज्यामुळे आग लागली. त्यांनी हेही सांगितले की क्लबचे मालक सौरभ लुथरा आणि गौरव लुथरा यांना लवकरच अटक केली जाईल.
