Dadar Shocking News : मुंबईला फिरायला आलेल्या लंडनच्या एका महिलेचा दादर रेल्वे स्थानकात मृत्यू झाल्यानं एकच खळबळ उडाली आहे. टॉयलेट शोधत असताना महिलेनं मेल एक्सप्रेसमध्ये प्रवेश केला आणि खाली उतरतानाच महिला ट्रेनमधून खाली पडली. ही धक्कादायक घटना 27 नोव्हेंबर रोजी दुपारी अडीच वाजताच्या सुमारास घडली होती.मध्य रेल्वेच्या दादर स्टेशनच्या प्लॅटफॉर्म क्रमांक 10 वर या महिलेचा मृत्यू झाला.लंडनमध्ये राहणारी 66 वर्षीय महिला तिचा पती बादशाह शेख आणि मुलासोबत अंबरनाथहून लोकलने दादरला उतरली होती.त्यांना विमानतळासाठी दुसरी लोकल पकडायची होती.
प्राथमिक चौकशीत अशी माहिती समोर आली आहे की,त्या महिलेला मधुमेहाचा आजार होता. स्टेशनवर शौचालय दिसत नसल्याने महिलेनं स्टेशनवर उभ्या असलेल्या मेल एक्सप्रेसमध्ये टॉयलेटसाठी मुलासोबत प्रवेश केला. टॉयलेट करून खाली उतरत असतानाच मेल एक्सप्रेस ट्रेन सुरू झाली.मुलाने तिला उतरायला मदत करण्याचा प्रयत्न केला, पण ती प्लॅटफॉर्म आणि ट्रेनच्या मधल्या गॅपमध्ये खाली पडली आणि त्याचदरम्यान ट्रेन सुरु झाल्याने महिलेचा अपघात झाला.
नक्की वाचा >> Viral Video: कॉर्पोरेटची गुलामी सोडून रिक्षा चालवली..आयुष्यात काय कमावलं? रिक्षावाल्यानं दिला मोलाचा संदेश
महिलेला सायन रुग्णालयात दाखल केलं, पण..
महिलेला डोक्यावर गंभीर दुखापत झाल्याने तिला जखमी अवस्थेत सायन रुग्णालयात नेण्यात आले,पण महिला मृत असल्याचं त्यावेळी घोषित करण्यात आलं.अपघाताच्या दुसऱ्या दिवशी म्हणजे 28 नोव्हेंबरला या दांपत्याची मुंबईहून लंडनला परत जाण्याची फ्लाइट होती. ते २७ तारखेला विमानतळाजवळील एका हॉटेलमध्ये राहण्यासाठी जात होते. या प्रकरणी दादर जीआरपीने चौकशी सुरू केली आहे.
30 वर्षांपासून लंडनमध्ये राहतात कुटुंबीय
मृत महिलेचे पती बादशाह शेख पूर्वी अंबरनाथमध्ये टोपली घेऊन फिरून मासे विकण्याचा व्यवसाय करत होते. नंतर नशिबाने साथ दिली आणि ते दुबईला गेले. कामातील प्रामाणिकपणा आणि मेहनत पाहून मालकाने त्यांना लंडनला नेले आणि तेथेच स्थायिक झाले. 30 वर्षांपासून ते कुटुंबासह लंडनमध्येच राहतात.
नक्की वाचा >> धर्मेंद्रवर वेड्यासारखी फिदा होती, तिच्यावरच होतं बॉबीचं क्रश, पॉकेटमध्ये ठेवायचा फोटो, ती अभिनेत्री कोण?
दर चार-पाच वर्षांनी ते कुटुंबासह मुंबई आणि बेंगळुरू येथे मित्र आणि नातेवाईकांना भेटायला येत असत. अंबरनाथमध्ये मासे विकण्याचा व्यवसाय करत असल्याने जुन्या आठवणी ताज्या करण्यासाठी कुटुंबासह मित्र आणि नातेवाईकांना भेटण्यासाठी यावेळीही ते मुंबईला आले होते. मृत महिलेचे पती बादशाह मूळचे हैदराबादचे रहिवासी आहेत. त्यामुळे पत्नीचे पार्थिव शरीर अंतिम संस्कारासाठी हैदराबादला नेण्यात आले आहे.
Track Latest News Live on Marathi.NDTV.com and get news updates from India and around the world
