महाराष्ट्रातील प्रदीर्घ काळापासून प्रलंबित असलेल्या स्थानिक स्वराज्य संस्थांच्या निवडणुकांचा पहिला टप्पा लवकरच पार पडत आहे. या पार्श्वभूमीवर, महाराष्ट्र सरकारने 2 डिसेंबर रोजी होणाऱ्या नगर परिषदा आणि नगर पंचायतींच्या निवडणुकांसाठी संबंधित जिल्ह्यातील कर्मचाऱ्यांसाठी शुल्क सार्वजनिक सुट्टी (Paid Holiday) जाहीर केली आहे.
मतदानासाठी सुट्टी
शुक्रवारी जारी करण्यात आलेल्या शासकीय निर्णयानुसार ज्या जिल्ह्यांमध्ये मंगळवारी मतदान होणार आहे, त्या जिल्ह्यांतील कर्मचारी, अधिकारी आणि कामगार यांना मतदानाचा हक्क बजावण्यासाठी ही पगारी सुट्टी मिळेल. उद्योग, ऊर्जा आणि कामगार विभागाने सांगितले की, मागील निवडणुकांमध्ये काही आस्थापनांनी पगारी सुट्टी किंवा कामातून वेळ दिला नाही. यामुळे अनेक लोकांना त्यांच्या मतदानाच्या हक्कापासून वंचित राहावे लागले. त्यामुळे, सर्व पात्र नागरिक आपला मतदानाचा हक्क बजावू शकतील याची खात्री करण्यासाठी हा निर्णय घेण्यात आला आहे.
शासकीय निर्णयात लोकप्रतिनिधी कायदा, 1951 मधील तरतुदींचा संदर्भ देण्यात आला आहे, ज्यात मतदानाच्या दिवशी मतदारांसाठी सशुल्क सुट्टी देणे बंधनकारक आहे.
(नक्की वाचा- AC लोकलमध्ये हाय-टेक फसवणूक! गुगल क्रोममुळे बिंग फुटलं; इंजीनिअर नवरा अन् बँकर बायकोला अटक)
कुणाला मिळणार सुट्टी?
पहिल्या टप्प्यात महाराष्ट्रातील 246 नगर परिषदा आणि 42 नगर पंचायतींमध्ये निवडणुका होत आहेत. हा सुट्टीचा नियम मतदार क्षेत्राबाहेर कामाची जागा असलेल्या कर्मचाऱ्यांसाठीही लागू असेल, म्हणजेच मतदार म्हणून नाव असलेल्या सर्व कर्मचाऱ्यांना ही सुट्टी मिळणार आहे.
कामगार विभागांतर्गत येणारी कारखाने, दुकाने, हॉटेल्स, व्यावसायिक आस्थापने, आयटी कंपन्या, मॉल्स आणि किरकोळ विक्री केंद्रे यांना या निर्देशाचे पालन करणे बंधनकारक आहे. जी आस्थापने अत्यावश्यक किंवा सतत सेवा पुरवतात, त्यांनी पूर्ण दिवसाची सुट्टी देणे शक्य नसल्यास, कर्मचाऱ्यांसाठी दोन ते तीन तासांची विशेष रजा मंजूर करावी, असे या जीआरमध्ये नमूद आहे.
नियम न पाळल्यास कारवाईचा इशारा
शासनाने स्पष्ट इशारा दिला आहे की, पगारी सुट्टी किंवा पुरेसा वेळ न दिल्यास आणि याबाबत तक्रारी प्राप्त झाल्यास, संबंधित आस्थापनांवर कायदेशीर कारवाई केली जाईल.
