Mumbai Metro3: मुंबईतील सार्वजनिक वाहतूक अधिक सोयीस्कर करण्यासाठी, मुंबई मेट्रो रेल कॉर्पोरेशन (MMRC) ने महत्त्वाचे पाऊल उचलले आहे. 'मुंबई मेट्रो लाईन 3' अर्थात 'अ‍ॅक्वा लाईन'वरील प्रवाशांसाठी आता व्हॉट्सॲप-आधारित तिकीट बुकिंग (WhatsApp-based ticketing) प्रणाली सुरू करण्यात आली आहे. या नव्या सुविधेमुळे प्रवाशांना तिकीटांसाठी लांब रांगांमध्ये उभे राहावे लागणार नाही, तसेच त्यांना तिकीट काढण्यासाठी सोपा पर्याय उपलब्ध झाला आहे.
'अ‍ॅक्वा लाईन' म्हणून ओळखली जाणारी मेट्रो लाईन 3 दक्षिण मुंबईतील कफ परेड (Cuffe Parade) आणि मुंबईच्या वायव्य भागातील आरे जेव्हीएलआर (Aarey JVLR) यांना जोडते.
डिजिटलायझेशनच्या दिशेने महत्त्वाचे पाऊल
एमएमआरसीच्या व्यवस्थापकीय संचालक अश्विनी भिडे (Ashwini Bhide) यांनी सांगितले की, "व्हॉट्सॲप तिकीट प्रणाली सुरू करण्यामागचा उद्देश प्रवाशांचा अनुभव अधिक चांगला करणे आहे. मुंबईतील नागरिकांना अखंडित, कार्यक्षम आणि टिकाऊ प्रवासाचा अनुभव देण्यासाठी आमची संस्था कटिबद्ध आहे, याचे हे द्योतक आहे." ही प्रणाली सुरू करण्याचा उद्देश कागदी तिकीट प्रणाली टप्प्याटप्प्याने बंद करून, डिजिटलायझेशनच्या दिशेने एक पाऊल पुढे टाकणे हा आहे.
( नक्की वाचा : Mumbai Metro 3 : मेट्रो 3 च्या स्टेशनवर मोफत Wi-Fi वापरायचंय? 'या' सोप्या स्टेप्स फॉलो करा आणि व्हा कनेक्ट )
एका वेळेस किती तिकीटं काढता येणार?
या नवीन सुविधेमुळे ग्राहक एकाच वेळी जास्तीत जास्त 6 (सहा) तिकिटे काढू शकतील. तिकीट बुकिंगसाठी अनेक पेमेंट पद्धती उपलब्ध असतील, ज्यात यूपीआय (UPI) चा समावेश आहे. यूपीआय (UPI) द्वारे पेमेंट केल्यास कोणतेही अतिरिक्त शुल्क (charges) लागणार नाही, मात्र कार्डने पेमेंट केल्यास नाममात्र व्यवहार शुल्क (nominal transaction charges) लागू होईल.
तिकीट बुक करण्याची सोपी पद्धत (Steps to Get Tickets Through WhatsApp):
मुंबई मेट्रो लाईन 3 वर व्हॉट्सॲपद्वारे तिकीट बुक करण्यासाठी प्रवाशांनी खालील सोप्या पायऱ्या (Steps) फॉलो कराव्यात:
व्हॉट्सॲप क्रमांक +91-98730-16836 वर "Hi" (हाय) मेसेज पाठवून प्रक्रियेची सुरुवात करा.
दुसरा पर्याय म्हणजे, तिकीट तयार करण्यासाठी स्टेशनवर लावलेला क्यूआर कोड (QR code) स्कॅन करा.
तिकीट बुकिंग आणि पेमेंट प्रक्रिया पूर्ण झाल्यावर, तुमचे तिकीट क्यूआर कोडच्या (QR Code) स्वरूपात स्क्रीनवर दिसेल.
मुंबई मेट्रो रेल कॉर्पोरेशन (MMRC) ने यापूर्वी लाईन 2A आणि लाईन 7 वर व्हॉट्सॲप तिकीट सेवेची यशस्वी अंमलबजावणी केली आहे. या यशानंतर आता ही सुविधा लाईन 3 वर देखील उपलब्ध झाली आहे, ज्यामुळे प्रवाशांना व्हॉट्सॲपच्या माध्यमातून सहजपणे तिकीट खरेदी करणे शक्य होणार आहे.
