Mumbai Rain: उकाड्यामुळे हैराण झालेल्या मुंबईकरांसाठी एक आनंदाची बातमी आहे. गेल्या अनेक दिवसांपासून पावसाची प्रतीक्षा करणाऱ्या मुंबईत अखेर वरुणराजाचे आगमन होणार असून येत्या शुक्रवारी मान्सूनपूर्व पावसाच्या सरी कोसळण्याची शक्यता आहे. त्यामुळे मुंबईकरांना आता घराबाहेर पडताना सोबत छत्री ठेवावी लागेल.
शुक्रवारपासून मुंबईत पावसाची हजेरी
हवामान तज्ज्ञांच्या अंदाजानुसार, मुंबई आणि आसपासच्या परिसरात या शुक्रवारपासून मान्सूनपूर्व पावसाला सुरुवात होऊ शकते. दक्षिण कोकणात गेल्या 48 ते 72 तासांपासून पावसाने आधीच हजेरी लावली आहे. हा पाऊस आता उत्तरेकडे सरकत असून या आठवड्याच्या अखेरीस तो मुंबईत धडकण्याची चिन्हे आहेत.
दक्षिण कोकणात पावसाचे आगमन
कोकण किनारपट्टीवर पावसाचे वातावरण तयार झाले असून दक्षिण कोकणातील अनेक भागात गेल्या 2 ते 3 दिवसांपासून मान्सूनपूर्व पाऊस पडत आहे. हाच बदलता हवामानाचा पट्टा आता उत्तर कोकण आणि मुंबईच्या दिशेने सरकत असल्यामुळे मुंबईकरांनाही उकाड्यापासून मोठा दिलासा मिळण्याची शक्यता आहे.
मान्सून यंदा लवकर धडकणार
यंदा मान्सूनचे आगमन वेळेपूर्वीच होण्याची शक्यता हवामान विभागाने (IMD) वर्तवली आहे. केरळमध्ये 26 मे पर्यंत मान्सून पोहोचू शकतो, जो नेहमीच्या 1 जून या तारखेपेक्षा एक आठवडा आधी आहे. मान्सूनचा पुढील प्रवास असाच राहिला, तर महाराष्ट्रात 2 जून आणि मुंबईत 5 जून रोजी अधिकृत मान्सून दाखल होऊ शकतो. मुंबईत मान्सून पोहोचण्याची सर्वसाधारण तारीख 11 जून असते.
