पुणे शहरातील वाढत्या वाहनसंख्येमुळे निर्माण होणारी वाहतूक कोंडी दूर करण्यासाठी सिंहगड रस्त्यावर उभारण्यात आलेला राजाराम पुलापासून ते फन टाईम थिएटरपर्यंतचा उड्डाणपूल नागरिकांच्या सेवेत दाखल झाला आहे. मुख्यमंत्री देवेंद्र फडणवीस यांच्या हस्ते दुसरा टप्प्याचे आज लोकार्पण करण्यात आले. त्यानंतर आज हा पुल वाहतुकीसाठी खुला करण्यात आला आहे. त्यामुळे पुणेकरांना मोठा दिलासा मिळणार आहे. यावेळी केंद्रीय नागरी विमान वाहतूक राज्यमंत्री मुरलीधर मोहळ, विधान परिषदेच्या उपसभापती डॉ. निलम गोऱ्हे, नगरविकास, परिवहन आणि सामाजिक न्याय विभागाच्या राज्यमंत्री माधुरी मिसाळ यासह अन्य मान्यवर उपस्थित होते.
सिंहगड रस्त्यावरून धायरी, नऱ्हे, खडकवासला, वडगाव बुद्रुक, नांदेड सिटी तसेच बेंगळुरू-मुंबई राष्ट्रीय महामार्गावर दररोज सुमारे दीड लाखाहून अधिक वाहनांची वाहतूक होते. या मार्गाच्या एका बाजूला मुठा नदी व दुसऱ्या बाजूस डोंगर असल्याने पर्यायी रस्ता शक्य नसल्यामुळे उड्डाणपूल उभारणे आवश्यक होते. पुणे महानगरपालिकेमार्फत उड्डाणपुलाचे भूमिपूजन केंद्रीय वाहतूक मंत्री नितीन गडकरी यांच्या हस्ते 21 सप्टेंबर 2021 रोजी करण्यात आले होते. हा उड्डाणपूल तीन टप्प्यांत पूर्ण करण्यात आला आहे.
नक्की वाचा - Pune News: पुणे जिल्ह्यासाठी स्थानिक सुट्ट्या जाहीर, पाहा सुट्ट्यांची संपूर्ण यादी
पहिल्या टप्प्यात सिंहगडकडून स्वारगेटकडे जाणारा 520 मीटर लांबीचा राजाराम पूल चौकातील उड्डाणपूल, खर्च रु. 15 कोटी, दुसऱ्या टप्प्यात विठ्ठलवाडी ते फन टाईम थिएटरदरम्यानचा स्वारगेटकडून सिंहगडकडे जाणारा 2.1 किमी लांबीचा उड्डाणपूल, खर्च रु. 61 कोटी, आणि तिसऱ्या टप्प्यात वीर शिवाजी काशीद चौक ते कै. प्रकाश विठ्ठल इनामदार चौकदरम्यानचा सिंहगडकडून स्वारगेटला जाणारा 1.5 किमी लांबीचा उड्डाणपूल, खर्च रु. ४२ कोटी उभारण्यात आला. या तीनही टप्प्यांसाठी एकूण 118.37 कोटी रुपये खर्च आला आहे.
Apple Store in Pune: मुंबईनंतर पुण्यातही सुरू होणार Apple Store, कधी आणि कुठे? वाचा सविस्तर
या उड्डाण पुलामुळे तीस मिनिटाचा कालावधी आता सहा मिनिटावर आला आहे. पूर्वी राजाराम पूल ते फन टाईम थिएटर या 2.6 किमी अंतरावरील सहा चौक पार करण्यासाठी 30 मिनिटांचा कालावधी लागत होता. नव्या उड्डाणपुलामुळे हा वेळ आता केवळ 5 ते 6 मिनिटांवर आला आहे. पुलाखालील रस्त्याचे सुयोग्य विकसन करून दोन्ही बाजूस तीन लेनची वाहतूक क्षमता, प्रशस्त पदपथ आणि पार्किंगची सुविधा उपलब्ध करण्यात आली आहे. तसेच दुभाजकाचे सुशोभीकरण सीएसआर अंतर्गत दोन एजन्सींमार्फत पूर्ण करण्यात आले आहे. त्याची देखभाल पुढील पाच वर्षे त्यांच्याच माध्यमातून होणार आहे. या उड्डाणपुलामुळे सिंहगड रस्त्यावरील वाहतूक कोंडी मोठ्या प्रमाणात कमी होऊन नागरिकांना दिलासा मिळणार आहे.
