WTC Final 2025: सध्या लॉर्ड्स क्रिकेट ग्राउंडवर आयसीसी वर्ल्ड टेस्ट चॅम्पियनशिप ट्रॉफीसाठी ऑस्ट्रेलिया आणि दक्षिण आफ्रिकमध्ये सामना सुरु आहे. सामन्याच्या दुसऱ्या दिवसाच्या अखेरीस ऑस्ट्रेलियाचे पारडे जड होताना दिसत आहे. पहिल्या डावात 212 धावा करणाऱ्या कांगारू संघाने पहिल्या डावात विरोधी संघाला फक्त 138 धावांत गुंडाळल्यानंतर दुसऱ्या डावात 8 बाद 144 धावा केल्या आहेत. त्यामुळे आफ्रिकेच्या संघाची धाकधुक वाढली आहे. विशेष म्हणजे लॉर्ड्स मैदानावरील एक खास रेकॉर्डही आता चर्चेत आला आहे.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
2005 पासून लॉर्ड्स क्रिकेट ग्राउंडवर कसोटी क्रिकेटमध्ये फक्त एकदाच एखादा संघ 200 पेक्षा जास्त धावांचा पाठलाग करू शकला आहे. दुसऱ्या दिवसाच्या अखेरीस ऑस्ट्रेलियन संघाची आघाडी 218 पर्यंत वाढली आहे. त्यांच्या हातात अजूनही दोन विकेट शिल्लक आहेत. उर्वरित फलंदाज आणखी काही महत्त्वाच्या धावा जोडू शकतात अशी अपेक्षा आहे. त्यानंतर आफ्रिकन संघाचे आव्हान आणखी वाढू शकते. याशिवाय, लॉर्ड्सचा हा भयानक विक्रम. अशा परिस्थितीत आफ्रिकेसाठी जेतेपद जिंकणे खूप कठीण जाणार आहे.
पहिले दोन दिवस संपल्यानंतर, लॉर्ड्सवर फलंदाजांवर गोलंदाजांचे वर्चस्व स्पष्टपणे दिसून येत आहे. दक्षिण आफ्रिकेकडून, कागिसो रबाडाने पहिल्या डावात एक विकेट घेण्यात यश मिळवले. अष्टपैलू मार्को जॅन्सननेही तीन बळी घेतले. परिणामी, कांगारू संघ पहिल्या डावात 212 धावांवर कोसळला यानंतर ऑस्ट्रेलियाकडून कर्णधार पॅट कमिन्सने कहर केला.
( नक्की वाचा : जगातील एकमेव क्रिकेटपटू जे भारताकडून पदार्पण करण्यापूर्वी इंग्लंडकडून खेळले, पदार्पणातच झळकावली सेंच्युरी )
त्याने आपल्या संघासाठी एकूण 18.1 षटके गोलंदाजी केली आणि 1.50 च्या इकॉनॉमीने फक्त 28 धावा खर्च करून आफ्रिकन फलंदाजांचे कंबरडे मोडले. त्याने एकूण सहा बळी घेतले. परिणामी, संपूर्ण संघ 57.1 षटकांत फक्त 138 धावांवर बाद झाला. दुसऱ्या डावातही ऑस्ट्रेलियन संघाची स्थिती फारशी चांगली नाही. दुसऱ्या दिवसाच्या अखेरीस, कांगारू संघ 40 षटकांत एकूण 144 धावांत आठ विकेट गमावल्यानंतर मैदानात संघर्ष करत आहे.
