Akola News : अकोल्यात 19 वर्षांच्या विवाहित महिलेनं घेतला गळफास, आत्महत्येमागे 'तो' संशयास्पद मुद्दा काय?

योगेश शिरसाट, प्रतिनिधी

Akola News :  अकोला जिल्ह्यात पातुर तालुक्यातील घोडेगाव येथे नुकतीच एक अत्यंत धक्कादायक घटना उघड झाली आहे. येथील 19 वर्षीय विवाहित तरुणीने राहत्या घरी गळफास घेऊन स्वत:चे आयुष्य संपवल्याची माहिती मिळाली आहे. या घटनेमुळे संपूर्ण परिसरात हळहळ व्यक्त होत आहे, मात्र या तरुणीने नेमक्या कोणत्या कारणामुळे आत्महत्या केली, याचे गूढ अद्याप कायम आहे.

काय आहे प्रकरण?

घटनेची माहिती मिळताच, तरुणीच्या कुटुंबीयांनी तिला तातडीने एका खासगी रुग्णालयात दाखल केले. मात्र, तिची प्रकृती अत्यंत गंभीर असल्याने तिला त्वरित अकोला येथील शासकीय रुग्णालयात हलवण्यात आले. दुर्दैवाने, तिथे उपचार सुरू असतानाच डॉक्टरांनी या विवाहित तरुणीला मृत घोषित केले.

( नक्की वाचा : Akola News : धनंजय मुंडेंच्या जवळच्या व्यक्तीनं रेल्वेसमोर उडी मारत दिला जीव, अकोल्यात खळबळ! कारण काय? )
 

चान्नी पोलिसांनी तत्काळ तपास सुरू केला आहे. ही आत्महत्या आहे की यामागे अन्य कोणताही संशयास्पद घटक आहे, याचा पोलीस कसून शोध घेत आहेत. पोलिसांनी घटनास्थळाचा पंचनामा केला असून, उमा यांच्या आयुष्यातील अलीकडील घडामोडी आणि त्यांच्या कुटुंबीयांचे सविस्तर जबाब नोंदवले जात आहेत.

काय आहे कारण?

या प्रकरणाच्या प्राथमिक तपासासंदर्भात चान्नी पोलीस स्टेशनचे ठाणेदार रवींद्र लांडे यांच्याशी संपर्क साधला असता, त्यांनी तपास सुरू असल्याची माहिती दिली. त्यांनी स्पष्ट केले की, “सध्या प्राथमिक तपास सुरू आहे. शवविच्छेदन अहवाल प्राप्त झाल्यानंतरच मृत्यूचे नेमके आणि निश्चित कारण स्पष्ट होईल. त्यानंतर नियमानुसार पुढील कायदेशीर कारवाई करण्यात येईल.”

विवाहित तरुणीच्या मृत्यूमागे नेमका कोणता मुद्दा आहे? हा मानसिक तणावाचा परिणाम आहे की कौटुंबिक कलह, अथवा या घटनेमागे काही वेगळे कारण दडलेले आहे? हे सर्व प्रश्न सध्या अनुत्तरित आहेत. पोलीस या प्रकरणाचे संपूर्ण सत्य समोर आणण्यासाठी वैद्यकीय अहवालाची आणि सखोल चौकशीची प्रतीक्षा करत आहेत.