बेंगळुरुमध्ये एका नर्सिंगच्या विद्यार्थिनीने एका कॅब ड्रायव्हरसह त्याच्या साथीदारांवर सामुहिक अत्याचाराचा आरोप केल्याने सर्वत्र खळबळ उडाली होती. मात्र पोलीस तपासात या तरुणाने संमतीनेच कॅब ड्रायव्हरशी संबंध ठेवल्याचे समोर आले आहे. मानेवरील लव्ह बाईट दिसत असल्याने बॉयफ्रेंड संशय घेईल, या भितीने खोटी तक्रार दिल्याचे उघडकीस आले आहे. या संपूर्ण घटनेने एकच खळबळ उडाली आहे.
काय आहे संपूर्ण प्रकरण?
टाईम्स ऑफ इंडियाच्या वृत्तानुसार, ही मुलगी केरळची रहिवासी आहे आणि बेंगळुरूमधील एका खाजगी महाविद्यालयात शिकत आहे. तिने ६ डिसेंबर रोजी माडीवाला पोलिस ठाण्यात तक्रार दाखल केली होती की, २ डिसेंबरच्या रात्री एम विश्वेश्वरय्या टर्मिनलजवळ ३३ वर्षीय कॅब ड्रायव्हर आणि त्याच्या काही साथीदारांनी तिच्यावर बलात्कार केला. स्टेशनवर पोहोचल्यानंतर तिने एर्नाकुलममध्ये राहणाऱ्या तिच्या प्रियकराला फोन केला आणि तिला सांगितले की ती सकाळी ट्रेनने येणार आहे. पण वाटेत कॅब ड्रायव्हर आणि त्याच्या साथीदारांनी तिच्यावर सामूहिक बलात्कार केल्याचा आरोप केला.
विद्यार्थिनीच्या तक्रारीवरून पोलिसांनी सामूहिक बलात्काराचा गुन्हा दाखल केला आणि प्रकरण बनसवाडी पोलिस ठाण्यात वर्ग केले. विद्यार्थिनीच्या जबाबावरून, पूर्व बेंगळुरू येथील त्याच्या घरातून ड्रायव्हरला अटक करण्यात आली. ड्रायव्हरने वारंवार निर्दोष असल्याचा दावा केला. पोलिसांनी तपास सुरू करताच, प्रकरणातील सत्य समोर आले. पोलिस तपास आणि व्हॉट्सअॅप चॅटवरून असे दिसून आले की मुलीने आरोपीसोबत संमतीने शारीरिक संबंध ठेवले होते. नंतर, प्रियकराने मुलीला तिच्या मानेवरील लव्ह बाईटबाबत विचारपूस केली. त्यानंतर मुलीने तिच्या प्रियकराकडे दावा केला की तिच्यावर सामूहिक बलात्कार झाला आहे. त्यानंतर दोघांनीही पोलिसांकडे धाव घेतली आणि तक्रार दाखल केली.
लव्ह बाईट लपवण्यासाठी सामूहिक बलात्काराचे आरोप
पण सीसीटीव्ही फुटेजमध्ये भलतेच प्रकरण उघड झाले.. व्हिडिओमध्ये स्पष्टपणे विद्यार्थीनी आणि ड्रायव्हर रात्री ११:३० ते सकाळी ५:३० पर्यंत स्टेशनवर फिरताना दिसत होते. ते अनेक वेळा कॅबमध्ये प्रवेश करताना आणि बाहेर पडताना दिसले, परंतु जबरदस्ती किंवा धमकीचा प्रकार नव्हता. पोलिसांनी सांगितले की दोघांमधील संमतीने केलेले वर्तन स्पष्टपणे स्पष्ट होते. या विद्यार्थिनीने दावा केला होता की कॅब ड्रायव्हर आणि त्याचा साथीदार बलात्कारात सहभागी होते, परंतु सीसीटीव्ही फुटेजमध्ये असे काहीही दिसून आले नाही.
(नक्की वाचा- VIDEO: नवले पुलावर वसंत मोरे थोडक्यात बचावले! फेसबुक लाईव्ह दरम्यानचा व्हिडीओ आला समोर)
वृत्तानुसार, महिला आणि ड्रायव्हर दोघेही केरळचे आहेत. आरोपी दोन मुलांचा बाप आहे आणि महिलेला पूर्वीपासून ओळखत होता. ३ डिसेंबर रोजी सकाळी, महिला ट्रेनमध्ये चढली. जेव्हा तिच्या प्रियकराने तिच्या मानेवरील खुणा विचारल्या तेव्हा ती घाबरली आणि खोटी कहाणी रचली. पोलिसांनी ड्रायव्हरचे व्हॉट्सअॅप मेसेजेस देखील तपासले. ३ डिसेंबरपासून, महिलेने त्याला "संमती दर्शविणारे" अनेक मेसेज पाठवले होते. त्यानंतर, पोलिसांनी महिलेला चौकशीसाठी बोलावले. प्रियकराच्या प्रश्नांपासून वाचण्यासाठी तिने सामूहिक बलात्काराची कहाणी रचल्याची कबुली दिली.
