अमोल सराफ, बुलढाणा:
Telangana Couple Death News: तेलंगणाहून जळगाव खान्देश येथे लग्नाच्या निमित्ताने जाणाऱ्या पद्मसिंह पाटील व नम्रता पाटील हे दांपत्य महामार्गावरुन रहस्यमयरित्या गायब झाल्याने सर्वत्र खळबळ उडाली होती. त्यांच्या कुटुंबियांसह नातेवाईकांनी पोलिसात तक्रार दाखल करत शोधाशोध सुरु केली होती. याचबाबत आता सर्वात मोठी अपडेट समोर आली असून पद्मसिंह पाटील व नम्रता पाटील यांचे मृतदेह एका विहिरीमध्ये आढळून आले आहेत.
पाटील दांपत्यासोबत काय घडलं?
याबाबत सविस्तर माहिती अशी की, पद्मसिंह दामू पाटील हे तेलंगणा राज्यातील सीतापुरम येथील रहिवासी आहेत. ते आणि त्यांची पत्नी नम्रता पाटील हे जळगावमधील लग्नकार्यासाठी निघाले होते. 27 नोव्हेंबरला ते सकाळी सहा वाजता तेलंगणा येथून जळगावसाठी निघाले, रात्री उशिरा ते पोहोचतील अशी अपेक्षा होती. मात्र ते जळगावमध्ये न पोहोचल्याने त्यांची शोधाशोध सुरु झाली. कुटुंबियांनी पोलिसात धाव घेत याबाबतची तक्रार दाखल केली होती.
मॅनेजर महिलेनं AI चा बोगस पास बनवला, AC ट्रेनमध्ये खूप दिवस केला फुकट प्रवास, पण डोंबिवलीत..
पोलिसांनी तपास सुरु केला असता त्यांचे शेवटचे लोकेशन हे बुलढाणा जिल्ह्यातील खामगाव ते मलकापूर दरम्यान महामार्गावर असलेल्या वडनेर गावाजवळ आढळून आले. याच ठिकाणी शोध घेत असतानाच बुलढाणा जिल्ह्यातील राष्ट्रीय महामार्गालगतच्या एका विहिरीत त्यांची कार आढळून आली आहे तसेच कारमध्ये दोघांचेही मृतदेहही आढळल्याने खळबळ उडाली आहे.
अपघात की घातपात?
पोलिसांनी क्रेनच्या साहाय्याने कार बाहेर काढल्यानंतर पद्मसिंह पाटील आणि नम्रता पाटील या दोघांचेही मृतदेह आढळून आलेत. या घटनेने परिसरात भितीचे वातावरण पसरले असून हा घातपात असल्याचा संशय नातेवाईकांनी व्यक्त केला आहे. महामार्गाजवळच विहीरीमध्ये कार आढळल्याने अपघाताचीही शक्यता वर्तवली जात आहे. पोलीस याबाबतचा अधिक तपास करत आहेत.
दरम्यान, महामार्गाजवळ असलेली ही विहीर न बुजवल्याने हा अपघात झाल्याचीही शंका व्यक्त केली जात आहे. याप्रकरणी राष्ट्रीय महामार्ग प्राधिकरण अधिकाऱ्यांवर गुन्हा दाखल करण्याचीही मागणी होत आहे. मात्र हा खरचं अपघात आहे की घातपात? याबाबतची अधिकृत स्पष्टता अद्याप आलेली नाही. या संशयास्पद मृत्यूचे गुढ उकलण्याचे मोठे आव्हान आता पोलिसांसमोर आहे.
नक्की वाचा >> रॅपिडो बाईकवर प्रवासाला निघाली, तरुणीसोबत रस्त्यातच घडली भयंकर घटना..Viral Video पाहून सर्वच थक्क
Track Latest News Live on Marathi.NDTV.com and get news updates from India and around the world
