Dombivli Crime News: डोंबिवलीत एक धक्कादायक प्रकार समोर आला असून केवळ मुलीकडे पाहण्याचा जाब विचारल्यामुळे एका कुटुंबाला बेदम मारहाण करण्यात आली आहे. भरवस्तीत मद्यधुंद तरुणांनी केलेल्या या गुंडगिरीमुळे परिसरात भीतीचे वातावरण पसरले असून या घटनेचा व्हिडिओ देखील सोशल मीडियावर व्हायरल झाला आहे.
काय आहे प्रकरण?
डोंबिवली पश्चिमेकडील विजयनगर परिसरात असलेल्या रामदास चाळीत मंगेश पाटील हे आपल्या कुटुंबासह राहतात. त्यांची लहान मुलगी घराबाहेर इतर मुलांसोबत खेळत असताना हा सर्व प्रकार घडला. ज्या ठिकाणी ही मुलगी खेळत होती, तिथेच काही तरुण दुचाकीवर बसले होते.
त्यातील काही तरुण सातत्याने या लहान मुलीकडे पाहत होते. आपल्या मुलीकडे अशा प्रकारे पाहिले जात असल्याचे लक्षात आल्यावर वडील मंगेश पाटील यांनी त्या तरुणांना हटकले आणि तुम्ही मुलीकडे का पाहता? असा सवाल केला. मात्र, त्या तरुणांनी नम्रपणे उत्तर देण्याऐवजी मंगेश यांना उलट उत्तर दिले आणि वाद घालण्यास सुरुवात केली.
( नक्की वाचा : लग्नाला झाले होते फक्त 2 महिने ! पत्नी प्रियकरासोबत पळाली,पती आणि मध्यस्थानं संपवलं आयुष्य )
मद्यधुंद तरुणांचा हल्ला
सुरुवातीला वाद वाढू नये म्हणून मंगेश पाटील यांनी विषय सोडून दिला आणि ते तिथून बाजूला झाले. मात्र, काही वेळातच तानाजी नावाचा तरुण त्याचा मित्र आदित्य आणि इतर काही साथीदारांना घेऊन तिथे आला. या टोळीने मंगेश यांच्याशी पुन्हा हुज्जत घालण्यास सुरुवात केली. भांडण सोडवण्यासाठी आणि मध्यस्थी करण्यासाठी मंगेश यांचे भाऊ महेश पाटील पुढे आले असता, मद्यधुंद असलेल्या या तरुणांनी संपूर्ण कुटुंबावर हल्ला चढवला. या तरुणांनी मंगेश, त्यांचे भाऊ महेश आणि महेश यांचा मुलगा साई या तिघांनाही बेदम मारहाण केली.
मारहाणीत तिघे जखमी
या हिंसक हल्ल्यात महेश पाटील यांच्या हाताला गंभीर दुखापत झाली असून ते मोठ्या प्रमाणात जखमी झाले आहेत. त्यांच्यासोबतच मंगेश आणि साई हे दोघेही जखमी झाले आहेत.
( नक्की वाचा : Sadhvi Death Mystery: इंजेक्शन,Insta पोस्ट आणि Viral Video, साध्वीच्या धक्कादायक मृत्यूनं लाखो अनुयायींना शॉक! )
या घटनेनंतर पाटील कुटुंबाने तातडीने पोलिसात धाव घेतली. विष्णूनगर पोलिसांनी या प्रकरणाची दखल घेत तानाजी, आदित्य आणि त्यांच्या इतर साथीदारांविरोधात गुन्हा दाखल केला आहे. भरदिवसा घडलेल्या या मारहाणीच्या घटनेमुळे स्थानिक नागरिकांमध्ये संताप व्यक्त केला जात असून, पोलिसांनी या गुंडांवर कठोर कारवाई करावी अशी मागणी पीडित कुटुंबाने केली आहे.
इथे पाहा VIDEO
