देवा राखुंडे, प्रतिनिधी
Baramati Crime News Today : बारामती तालुक्यातील सुपा पोलीस ठाण्याच्या हद्दीतून दंडवाडी येथील ऋषिकेश विजय चांदुगडे याचं अपहरण झाल्याची खबर पोलिसांना मिळाली होती.सुपा पोलिसांनी या प्रकरणाची तातडीनं दखल घेतली. इतर पोलीस ठाण्यातील कर्मचाऱ्यांच्या मदतीने त्यांनी दिवेघाट परिसरातून दोन आरोपींना अटक केली. ओंकार प्रकाश भोसले आणि तन्मय सुधीर साळुंखे अशी अटक केलेल्या आरोपींची नावे आहेत.दरम्यान,पोलिसांनी अपहरण झालेल्या ऋषिकेश चांदगुडेचा शोध लावला आहे. त्यामुळे सर्वच थरातून सुपा पोलिसांचं कौतुक केलं जात आहे.
याप्रकरणी सुपा पोलीस ठाण्याचे पोलीस निरीक्षक नवसरे यांनी दिलेल्या माहितीनुसार,07 जून 2026 रोजी सुपा पोलीस स्टेशन हद्दीतून ऋषिकेश विजय चांदगुडे (रा.दंडवाडी,ता.बारामती)याचे अपहरण झाल्याची माहिती पोलिसांना प्राप्त झाली.लाल रंगाची स्विफ्ट कार क्र. MH-42-BJ-4445 मधून ओंकार प्रकाश भोसले व तन्मय सुधीर साळुंखे यांनी ऋषिकेश चांदगुडेला जबरदस्तीने घेऊन सासवडच्या दिशेने नेल्याची माहिती मिळाली.
पोलिसांना त्या सूचना देण्यात आल्या अन्..
ही माहिती प्राप्त होताच सहाय्यक पोलीस निरीक्षक नवसरे यांच्या नेतृत्वाखाली पोलीस उपनिरीक्षक जिनेश कोळी,पोलीस हवालदार विशाल गजरे,पोलीस हवालदार रुपेश साळुंखे,पोलीस हवालदार संदीप लोंढे,चालक पोलीस शिपाई सोमनाथ होले,पोलीस शिपाई सागर वाघमोडे,पोलीस शिपाई संतोष जावीर, पोलीस शिपाई भाऊसाहेब चौधरी,महिला पोलीस हवालदार दिपाली मोहिते,पोलीस शिपाई सचिन दरेकर व पोलीस शिपाई विलास वाघमारे यांचे विशेष पथक तात्काळ रवाना करण्यात आले.तसेच जेजुरी,सासवड,उरुळीकांचन व यवत पोलीस स्टेशन यांना नाकाबंदीबाबत सूचना देण्यात आल्या.
नक्की वाचा >> Mumbai News: मुंबई विमानतळावर भाजप पदाधिकाऱ्याला अटक, रवींद्र चव्हाण यांच्यासोबतचा 'तो' फोटोही आला समोर
तपासादरम्यान कुलदीप चांदगुडे यांना प्राप्त झालेल्या मोबाईल कॉलची माहिती मिळाल्यानंतर संबंधित मोबाईल क्रमांकाचे तांत्रिक विश्लेषण करण्यात आले.त्यामध्ये लोकेशन दिवेघाट परिसरात असल्याचे निष्पन्न झाले.त्यानुसार पोलीस उपनिरीक्षक जिनेश कोळी,पोलीस हवालदार रुपेश साळुंखे,पोलीस हवालदार विशाल गजरे,चालक पोलीस शिपाई सोमनाथ होले, पोलीस शिपाई विलास वाघमारे व पोलीस शिपाई भाऊसाहेब चौधरी यांनी तात्काळ दिवेघाट परिसरात जाऊन संशयित वाहनाचा पाठलाग सुरू केला.
अखेर ऋषिकेश विजय चांदगुडे सापडला
दरम्यान सासवड पोलीस स्टेशनचे पोलीस निरीक्षक कदम यांच्याशी संपर्क साधून मदत मागविण्यात आली.त्यांच्या सूचनेनुसार सासवड पोलीस स्टेशनचे पोलीस उपनिरीक्षक जाधव व त्यांचे पथक मदतीस दाखल झाले.संयुक्त कारवाईदरम्यान पुरंदरच्या झेंडेवाडी येथे संशयित स्विफ्ट वाहन अडविण्यात आले.वाहनामध्ये ओंकार प्रकाश भोसले (वय 27 वर्ष),तन्मय सुधीर साळुंखे (वय 20 वर्ष)व दिव्या ओंकार भोसले (वय 22 वर्ष),सर्व रा.सातव चौक,बारामती आढळून आले.त्यांना ताब्यात घेण्यात आले.त्यानंतर तांत्रिक माहितीच्या आधारे अपहरण झालेला ऋषिकेश विजय चांदगुडे यास सुरक्षितरित्या शोधून काढण्यात आले.
नक्की वाचा >> Ambernath News: अंबरनाथ अलर्ट मोडवर, भगतसिंग नगर परिसरात खळबळजनक घटना, आरोपी शरीफ शेखला अटक
याप्रकरणी फिर्यादी ऋषिकेश विजय चांदगुडे यांच्या फिर्यादीवरून सुपा पोलीस स्टेशन येथे गुन्हा रजि.नं.119/2026 अन्वये बीएनएस कलम 140(1),118(1),115,352,351(2),3(5) प्रमाणे गुन्हा दाखल करण्यात आला आहे.या गुन्ह्यातील आरोपी ओंकार प्रकाश भोसले व तन्मय सुधीर साळुंखे यांना अटक करण्यात आली असून त्यांना न्यायालयासमोर हजर केले असता पोलीस कोठडी रिमांड प्राप्त झाली आहे.गुन्ह्याचा पुढील तपास पोलीस उपनिरीक्षक दिनेश कोळी हे करीत आहेत.
ही कारवाई माननीय पोलीस अधीक्षक संदीपसिंह गिल,अप्पर पोलीस अधीक्षक गणेश बिराजदार ,उपविभागीय पोलीस अधिकारी सुदर्शन राठोड यांचे मार्गदर्शनाखाली,सहाय्यक पोलीस निरीक्षक नवसरे यांच्या नेतृत्वाखाली पोलीस उपनिरीक्षक जिनेश कोळी,पोलीस हवालदार विशाल गजरे,पोलीस हवालदार रुपेश साळुंखे,पोलीस हवालदार संदीप लोंढे,चालक पोलीस शिपाई सोमनाथ होले,पोलीस शिपाई सागर वाघमोडे,पोलीस शिपाई संतोष जावीर,पोलीस शिपाई भाऊसाहेब चौधरी,महिला पोलीस हवालदार दिपाली मोहिते,पोलीस शिपाई सचिन दरेकर व पोलीस शिपाई विलास वाघमारे यांनी यशस्वीरित्या पार पाडली.
