'बिग बॉस 19' या रिअ‍ॅलिटी शोमधील सदस्य आणि स्टँडअप कॉमेडियन प्रणित मोरे अचानक शोमधून बाहेर पडल्याने त्याच्या चाहत्यांना मोठा धक्का बसला आहे. सुरुवातीला हा सामान्य निर्णय वाटत असला तरी, मिळालेल्या माहितीनुसार प्रणित मोरे यांना डेंग्यूची लागण झाल्यामुळे वैद्यकीय कारणास्तव त्यांना शोमधून बाहेर काढण्यात आले आहे. त्याला रुग्णालयात उपचारासाठी दाखल करण्यात आले आहे.
प्रणित मोरेच्या टीमने त्याच्या प्रकृतीत सुधारणा होत असल्याची माहिती दिली आहे. त्याच्यावर आवश्यक ते उपचार सुरू आहेत. वैद्यकीय विश्रांतीनंतर त्याला पुन्हा शोमध्ये 'सीक्रेट रूम'मध्ये पाठवले जाण्याची शक्यता वर्तवली जात आहे, ज्यामुळे त्याचे चाहते आनंदी झाले आहेत. प्रणित मोरे लवकर बरे होऊन पुन्हा बिग बॉसच्या घरात दाखल होतील, अशी आशा त्यांचे चाहते व्यक्त करत आहेत.
डेंग्यूची लक्षणे आणि उपचाराचा कालावधी
डेंग्यूची लागण झालेल्या रुग्णाला योग्य वेळी उपचार मिळाल्यास, ते साधारणपणे एका आठवड्यात बरे होतात. मात्र, पूर्णपणे सामान्य हालचाली सुरू करण्यासाठी आणि थकवा कमी होण्यासाठी 2 ते 4 आठवड्यांचा कालावधी लागू शकतो. तज्ज्ञांच्या मते, डास चावल्यानंतर 4 ते 10 दिवसांनी डेंग्यूची लक्षणे दिसू लागतात आणि ही लक्षणे 2 ते 7 दिवसांपर्यंत टिकू शकतात.
(नक्की वाचा- Video : 'योग्य पद्धतीने कचरा कसा काढावा', प्रसिद्ध अभिनेत्री देतेय ऑनलाइन धडे; चाहत्यांना भलताच राग)
डेंग्यूची प्रमुख लक्षणे
- ताप अचानक वाढतो आणि तो अनेकदा 102°F ते 104°F पर्यंत पोहोचतो.
- तीव्र डोकेदुखी होते, विशेषतः डोळ्यांच्या मागे तीव्र वेदना होतात.
- हाडे आणि स्नायूंमध्ये खूप तीव्र वेदना होतात.
- उलटी आणि मळमळ
- शरीरावर पुरळ येणे
- अति जास्त थकवा आणि अशक्तपणा
- गंभीर परिस्थितीत पोटदुखी, श्वास घेण्यास त्रास, वारंवार उलट्या होणे आणि बेशुद्धी यासारख्या समस्या उद्भवू शकतात.
डेंग्यूतून लवकर बरे होण्यासाठी आहार आणि काळजी
- पुरेसे पाणी, फळांचा रस आणि नारळपाणी यांचे भरपूर सेवन करा.
- जास्तीत जास्त आराम करा.
- साधे आणि सकस अन्न खा.
- डॉक्टरांच्या सल्ल्याशिवाय कोणतीही औषधे घेऊ नका आणि लक्षणांवर बारकाईने लक्ष ठेवा.
काय टाळावे?
पोटाच्या समस्या निर्माण करणारे जड, मसालेदार किंवा तेलकट अन्नपदार्थ खाणे टाळा.
या काळात कोणताही कठीण किंवा जास्त शारीरिक व्यायाम टाळा, ज्यामुळे तुमच्या रिकव्हरीमध्ये अडथळा येऊ शकतो.
