Madhuri Dixit Song: बॉलिवूडची 'धक धक गर्ल' माधुरी दीक्षितच्या करिअरमधील सर्वात गाजलेल्या गाण्यांपैकी एक म्हणजे 'चने के खेत में'. पण तब्बल 32 वर्षांपूर्वी जेव्हा या गाण्याची निर्मिती होत होती, तेव्हा खुद्द माधुरी आणि प्रसिद्ध कोरिओग्राफर सरोज खान यांनी हे गाणं चक्क रिजेक्ट केलं होतं. आज हे गाणं बॉलिवूडचं कल्ट साँग मानलं जातं, पण त्यामागचा हा रंजक किस्सा फार कमी लोकांना माहित आहे.
माधुरी आणि सरोज खान यांनी दिला होता नकार
1994 मध्ये 'अंजाम' या चित्रपटाचं शूटिंग सुरू होतं. दिग्दर्शक राहुल रवैल आणि संगीतकार आनंद-मिलिंद यांनी 'चने के खेत में' हे गाणं चित्रपटात घेण्याचं ठरवलं. मात्र, जेव्हा या गाण्याची धून माधुरी दीक्षित आणि कोरिओग्राफर सरोज खान यांनी ऐकली, तेव्हा त्यांनी यावर डान्स करणं शक्य नसल्याचं सांगत स्पष्ट नकार दिला होता. या गाण्याच्या ठेक्यावर नेमक्या कोणत्या स्टेप्स करायच्या, हे त्यांना उमजत नव्हतं. सरोज खान यांनी तर हे गाणं डान्ससाठी योग्यच नसल्याचं मत मांडलं होतं.
( नक्की वाचा : Varun Dhawan: 27 कोटींचा तोटा, तरीही वरुण धवननं एकदाही विचारलं नाही, निर्मात्यानं सांगितली मनातील सल )
दिग्दर्शकाचा हट्ट आणि कल्पकता
दिग्दर्शक राहुल रवैल मात्र आपल्या निर्णयावर ठाम होते. त्यांचा एक वेगळा व्हिजन होता आणि त्यांनी माधुरी आणि सरोज खान या दोघांनाही गाण्याचं महत्त्व पटवून दिलं. त्यांच्या आग्रहाखातर अखेर या गाण्याचं शूटिंग सुरू झालं. सरोज खान यांनी त्यांच्या कोरिओग्राफीने असं काही जादूई काम केलं की, त्या गाण्याने इतिहास रचला. माधुरीने ज्या देशी अंदाजात आणि नजाकतीने या गाण्यावर डान्स केला, त्याने प्रेक्षकांना वेड लावलं.
सुपरहिट झालं गाणं
रिलीज होताच 'चने के खेत में' हे गाणं संपूर्ण देशात सुपरहिट झालं. आज 32 वर्षांनंतर, म्हणजेच 2026 मध्येही हे गाणं लग्न सोहळे, पार्ट्या आणि सोशल मीडियावर तितकंच लोकप्रिय आहे. 'अंजाम' चित्रपटात शाहरुख खान जरी खलनायकाच्या भूमिकेत होता, तरीही या गाण्याने चित्रपटाला एक वेगळी सकारात्मक ओळख मिळवून दिली.
( नक्की वाचा : कियान कपूरला पाहिलंत का? आई करिश्मा आणि बहीण समायरासोबत दिसला खास चार्म; वडिलांच्या 'त्या' आठवणी पुन्हा ताज्या )
करिअरमधील सर्वात आव्हानात्मक गाणं
सरोज खान यांनी नंतर अनेकदा सांगितलं की, हे गाणं त्यांच्या सर्वोत्कृष्ट कामांपैकी एक आहे. खुद्द माधुरी दीक्षितनेही आपल्या मुलाखतींमध्ये मान्य केलं आहे की, 'चने के खेत में' हे तिच्या करिअरमधील सर्वात आव्हानात्मक पण आवडतं गाणं आहे. दिग्दर्शकाच्या हट्टामुळे बॉलिवूडला एक अजरामर गाणं मिळालं, हेच यावरून सिद्ध होतं.
इथे पाहा संपूर्ण गाणं
