उत्तराखंडमधील रुडकीजवळील मंगलौर मोहल्ला पठानपुरा येथे एक चकीत करणारी घटना समोर आली आहे. येथील एका भिकारी महिलेजवळ 1 लाख रुपयांच्या जवळपास रोकड सापडली आहे. सुमारे 13 वर्षांपासून एका घराबाहेर जीवन व्यतीत करणाऱ्या या महिलेकडे एवढी मोठी रक्कम पाहून परिसरातील लोकांना मोठे आश्चर्य वाटले.
कशी उघड झाली घटना?
परिसरातील काही लोकांनी या महिलेला त्या जागेवरून हटवण्याचा प्रयत्न केला, त्यावेळी हे उघड झाले. दरम्यान लोकांची नजर तिच्या झोळ्यातील रोख रकमेवर पडली. झोळीत नोटांचे बंडल दिसताच लोक स्तब्ध झाले. तातडीने या घटनेची माहिती लोकांनी पोलिसांना दिली.
पोलिसांची घटनास्थळी धाव
घटनेची माहिती मिळताच पोलिसांचे पथक तात्काळ घटनास्थळी दाखल झाले आणि त्यांनी परिस्थितीचा आढावा घेतला. स्थानिकांनी दिलेल्या माहितीनुसार, सापडलेल्या नोटांची मोजणी करण्यात आली. ही रक्कम अंदाजे 1 लाख रुपयांच्या आसपास असण्याची शक्यता आहे.
पोलिसांनी या प्रकरणाची गंभीरता लक्षात घेऊन सांगितले की, संबंधित महिलेला लवकरच एका सुरक्षित ठिकाणी हलवले जाईल. तसेच, तिच्याकडून जप्त केलेली मोठी रक्कम एका विश्वासू व्यक्तीकडे सुपूर्द केली जाणार आहे. एवढी मोठी रोकड मिळाल्याची माहिती परिसरात पसरल्यानंतर चोरीच्या धोक्यामुळे महिलेच्या सुरक्षिततेला पोलिसांनी प्राधान्य दिले आहे.
स्थानिकांनी व्यक्त केले आश्चर्य
या घटनेमुळे स्थानिकांनी आश्चर्य व्यक्त केले आहे. एका स्थानिक रहिवाशाने सांगितले की, "इतकी वर्षे एक भिकारी महिला आपल्याजवळ इतकी मोठी रक्कम घेऊन राहत होती, यावर आमचा विश्वास बसत नाहीये. आता ही बातमी पसरल्याने महिलेला सुरक्षित स्थळी पाठवणे अत्यंत आवश्यक आहे, अन्यथा तिला नुकसान होण्याची शक्यता आहे."
