Sonom Wangchuk News: लडाखमधील पर्यावरणवादी कार्यकर्ते सोनम वांगचूक यांची लवकरच तुरुंगातून सुटका होणार आहे. केंद्रीय गृहमंत्रालयाने सोनम वांगचूक यांना तात्काळ सोडण्याचे आदेश दिले आहेत. सरकार लडाखमध्ये शांतता, स्थिरता आणि परस्पर विश्वासाचे वातावरण राखण्यासाठी वचनबद्ध आहे, ज्यामुळे सर्वांशी रचनात्मक आणि अर्थपूर्ण संवाद साधता येईल. यासाठी आणि योग्य विचारविनिमयानंतर सोनम वांगचुक यांची अटक तात्काळ रद्द करण्याचा निर्णय घेतला आहे, असं केंद्रीय गृहमंत्रालयाने आपल्या आदेशात म्हटलं आहे.
पर्यावरणवादी कार्यकर्ते व लडाख राज्यासाठीच्या आंदोलनात अग्रभागी असलेल्या सोनम वांगचुक सप्टेंबर 2025 मध्ये लेहमध्ये राष्ट्रीय सुरक्षा कायद्याखाली अटक करण्यात आली होती. लेहमध्ये बुधवारी आंदोलनात हिंसाचार झाला होता. त्यासाठी वांगचुक जबाबदार असल्याचा आरोप केंद्र सरकारने केला होता. त्यानुसार सार्वजनिक सुव्यवस्था राखण्याच्या उद्देशाने लेहच्या जिल्हा दंडाधिकाऱ्यांनी जारी केलेल्या आदेशानुसार सोनम वांगचुक यांना २६ सप्टेंबर २०२५ रोजी राष्ट्रीय सुरक्षा कायदा (NSA) च्या तरतुदींनुसार ताब्यात घेण्यात आले होते.
केंद्रीय गृह मंत्रालयाने काय म्हटले?
केंद्र सरकारने सांगितले की, लडाखमधील लोकांच्या आकांक्षा आणि चिंता दूर करण्यासाठी सरकार विविध भागधारक आणि समुदाय नेत्यांशी संपर्क साधत आहे. बंद आणि निषेधांचे सध्याचे वातावरण समाजाच्या शांततापूर्ण स्वरूपासाठी हानिकारक ठरले आहे आणि त्याचा विद्यार्थी, नोकरी शोधणारे, व्यवसाय, पर्यटन संचालक आणि पर्यटकांसह समाजाच्या विविध घटकांवर तसेच लडाखच्या अर्थव्यवस्थेवर गंभीर परिणाम झाला आहे. लडाखमध्ये शांतता आणि स्थिरता प्रस्थापित करण्यासाठी सरकार वचनबद्ध आहे. हे उद्दिष्ट साध्य करण्यासाठी, योग्य विचारविनिमयानंतर, सरकारने राष्ट्रीय सुरक्षा कायद्या (NSA) अंतर्गत अधिकारांचा वापर करून सोनम वांगचुक यांची अटक तात्काळ रद्द करण्याचा निर्णय घेतला आहे.
काय आहे प्रकरण?
२४ सप्टेंबर रोजी केंद्रशासित प्रदेशात झालेल्या हिंसाचारात चार जणांना आपले प्राण गमवावे लागले. लडाखला सहाव्या अनुसूचीचा दर्जा आणि राज्याचा दर्जा मिळावा यासाठी लेहमध्ये झालेल्या निदर्शनांदरम्यान ही हिंसाचार घडला. हिंसाचारात सुमारे ९० लोक जखमी झाले. २६ सप्टेंबर रोजी, सोनम वांगचुक यांना लडाखमध्ये हिंसक निदर्शने भडकवल्याच्या आरोपाखाली ताब्यात घेण्यात आले. त्यानंतर त्यांना राजस्थानमधील जोधपूर मध्यवर्ती कारागृहात पाठवण्यात आले. शिवाय, प्रशासनाने चार लोकांच्या मृत्यूची दंडाधिकारी चौकशीचे आदेश दिले आहेत. स्थानिक रहिवाशांनी न्यायालयीन चौकशीची मागणी केली आहे.
Track Latest News Live on Marathi.NDTV.com and get news updates from India and around the world
