Vande Bharat Sleeper Train : भारतीय रेल्वे लवकरच प्रवासाचा अनुभव पूर्णपणे बदलून टाकणारी एक मोठी घोषणा करण्याच्या तयारीत आहे. अनेक दिवसांपासून ज्याची प्रतीक्षा होती, ती देशातील पहिली वंदे भारत स्लीपर ट्रेन अखेर या महिन्याच्या अखेरीस रुळावर धावणार आहे.
ही विशेष ट्रेन ईशान्य भारत आणि पूर्व भारताला जोडण्यासाठी महत्त्वाची भूमिका बजावणार असून गुवाहाटी आणि कोलकाता या दोन प्रमुख शहरांदरम्यानचा प्रवास आता अधिक वेगवान आणि सुखकर होणार आहे. रात्रभराच्या प्रवासासाठी तयार केलेली ही ट्रेन कनेक्टिव्हिटीच्या दृष्टीने एक मैलाचा दगड ठरणार आहे.
काय आहे सर्वात मोठं वैशिष्ट्य?
या ट्रेनचे सर्वात मोठे वेगळेपण म्हणजे यातील तिकीट वाटपाची पद्धत. या पहिल्या वंदे भारत स्लीपर ट्रेनमध्ये कोणताही व्हीआयपी किंवा इमर्जन्सी कोटा असणार नाही. सर्वसामान्यांना केंद्रस्थानी ठेवून हा निर्णय घेण्यात आला आहे. रेल्वेचे वरिष्ठ अधिकारी देखील प्रवासासाठी कोणत्याही फ्री पासेसचा वापर करू शकणार नाहीत.
प्रवाशांना केवळ कन्फर्म तिकिटेच दिली जातील, ज्यामुळे वेटिंग लिस्टचा मनस्ताप वाचणार आहे. विशेष म्हणजे, यामध्ये आरएसी (RAC) तिकीट असलेल्या प्रवाशांना परवानगी दिली जाणार नाही, त्यामुळे प्रवाशांना आपली जागा शेअर करण्याची गरज पडणार नाही.
(नक्की वाचा : 3000 वाढपी, 100 ट्रॅक्टर्सचा ताफा, लाखो भाविकांचा जनसागर, हिवरा आश्रमातील महापंगतीचे नियोजन पाहून व्हाल थक्क )
आलिशान सुविधा आणि स्थानिक भोजनाची मेजवानी
प्रवाशांच्या आरामासाठी रेल्वेने यावेळी विशेष खबरदारी घेतली आहे. नेहमीच्या ट्रेनच्या तुलनेत या ट्रेनमध्ये अतिशय प्रगत आणि दर्जेदार बेडरोल दिले जातील, ज्यात ब्लँकेट कव्हरचाही समावेश असेल. प्रवाशांना प्रवासादरम्यान स्थानिक खाद्यपदार्थांचा आस्वाद घेता येईल, ज्यामुळे भारतीय संस्कृतीची ओळख प्रवासातूनच होईल.
ट्रेनमधील सर्व कर्मचारी एका विशिष्ट गणवेशात असतील, जे प्रवाशांच्या सेवेसाठी सदैव तत्पर राहतील. ही ट्रेन तांत्रिकदृष्ट्या जितकी सक्षम आहे, तितकीच ती भारतीय संस्कृतीचे दर्शन घडवणारी देखील असेल.
बर्थची संख्या आणि कोचची वैशिष्ट्ये
या हाय-टेक ट्रेनमध्ये एकूण 16 कोच असतील. यामध्ये 3 एसीचे 11 कोच असून त्यात 611 बर्थ उपलब्ध आहेत. 2 एसीचे 4 कोच असून त्यात 188 बर्थ आहेत, तर 1 एसीचा 1 कोच असून त्यात 24 बर्थची सोय करण्यात आली आहे. अशा प्रकारे एकूण 823 बर्थ प्रवाशांसाठी उपलब्ध असतील.
प्रत्येक बर्थ हा शरीरशास्त्राचा विचार करून बनवण्यात आला असून त्याला उत्तम दर्जाचे कुशन देण्यात आले आहे, जेणेकरून झोपताना प्रवाशांना कोणताही त्रास होणार नाही.
प्रवासातील सुरक्षा आणि हाय-टेक फिचर्स
वंदे भारत स्लीपर ट्रेनमध्ये सुरक्षिततेची विशेष काळजी घेण्यात आली आहे. यात स्वयंचलित दरवाजे आणि कोचमधील हालचाल सुलभ करण्यासाठी आधुनिक वेस्टिब्युल्स देण्यात आले आहेत. प्रगत सस्पेन्शन आणि आवाज कमी करणाऱ्या तंत्रज्ञानामुळे प्रवाशांना धक्के जाणवणार नाहीत.
रेल्वेची सुरक्षा यंत्रणा कवच, इमर्जन्सी टॉक-बॅक सिस्टीम आणि स्वच्छतेसाठी निर्जंतुकीकरण तंत्रज्ञान यांसारखी आधुनिक फिचर्स या ट्रेनला जागतिक दर्जाचा दर्जा मिळवून देण्यासाठी सज्ज आहेत.
