Trending News: एखाद्या पुरुष रुग्णाला जेव्हा डॉक्टर सांगतात की तुमच्या पोटात चक्क गर्भाशय आहे, तेव्हा त्या व्यक्तीच्या पायाखालची जमीन सरकणे स्वाभाविक आहे. असाच काहीसा धक्कादायक आणि तितकाच विचित्र प्रकार सध्या समोर आला आहे. पोटदुखीच्या त्रासामुळे त्रस्त असलेल्या एका व्यक्तीने जेव्हा आपले स्कॅनिंग केले, तेव्हा आलेल्या रिपोर्टने केवळ त्या रुग्णालाच नाही तर संपूर्ण शहराला हादरवून सोडले. हा प्रकार नेमका कुठे घडला आणि यामागील सत्य काय आहे, हे जाणून घेऊया.
काय आहे प्रकरण?
मध्य प्रदेशातील सतना जिल्ह्यामध्ये हा अजब प्रकार उघडकीस आला आहे. येथील उचेहरा नगर पंचायतीचे अध्यक्ष निरंजन प्रजापति यांना गेल्या काही दिवसांपासून पोटाचा त्रास होत होता. सतत होणाऱ्या वेदनांमुळे त्यांनी 14 जानेवारी रोजी एका प्रसिद्ध डायग्नोस्टिक सेंटरमध्ये जाऊन सोनोग्राफी करण्याचा निर्णय घेतला.
मात्र सोनोग्राफीचा रिपोर्ट हातात आल्यावर त्यांना आपल्या डोळ्यांवर विश्वासच बसला नाही. रिपोर्टमध्ये चक्क नमूद करण्यात आले होते की, या 47 वर्षीय पुरुषाच्या शरीरात यूट्रस म्हणजेच गर्भाशय आहे आणि विशेष म्हणजे ते गर्भाशय उलटे आहे. एका पुरुषाच्या शरीरात गर्भपिशवी असण्याचा हा रिपोर्ट पाहून एकच खळबळ उडाली.
( नक्की वाचा : Pune News: खंबाटकी घाटाची झंझटच संपली, 45 मिनिटांचा प्रवास आता फक्त 7 मिनिटांत ! वाचा सर्व माहिती )
सतना डायग्नोस्टिक सेंटरमध्ये ही तपासणी करण्यात आली होती. निरंजन प्रजापति हे स्वतः लोकप्रतिनिधी असल्याने या घटनेची चर्चा संपूर्ण जिल्ह्यात वाऱ्यासारखी पसरली. जेव्हा त्यांना हा रिपोर्ट मिळाला, तेव्हा त्यांना मानसिक धक्का बसला. एका पुरुषाच्या वैद्यकीय चाचणीत इतकी मोठी तफावत कशी असू शकते, असा प्रश्न आता उपस्थित केला जात आहे.
डॉक्टरांनी काय केलं?
या विचित्र रिपोर्टबाबत जेव्हा निरंजन प्रजापति यांनी संबंधित डायग्नोस्टिक सेंटरचे संचालक डॉ. अरविंद सराफ यांच्याकडे विचारणा केली, तेव्हा त्यांनी या विषयावर काहीही बोलण्यास नकार दिला.
डॉक्टरांच्या या भूमिकेमुळे संशय अधिकच वाढला आणि हा प्रकार वैद्यकीय क्षेत्रातील गंभीर निष्काळजीपणा असल्याचे स्पष्ट झाले. आपली बदनामी आणि चुकीच्या रिपोर्टमुळे होणारा मानसिक त्रास लक्षात घेऊन प्रजापति यांनी थेट पोलीस ठाण्यात धाव घेतली आहे. त्यांनी या प्रकरणाची तक्रार नोंदवली असून दोषींवर कडक कारवाई करण्याची मागणी केली आहे.
( नक्की वाचा : Nashik News: आई-बाबा मला माफ करा! हातावर शेवटचा संदेश लिहून नाशिकमध्ये 21 वर्षांच्या तरुणीनं संपवलं आयुष्य )
प्रशासनाकडून चौकशीचे आदेश
या प्रकरणाची गांभीर्याने दखल घेत सतना जिल्ह्याचे मुख्य वैद्यकीय आणि आरोग्य अधिकारी (CMHO) डॉ. मनोज शुक्ला यांनी चौकशीचे आश्वासन दिले आहे. चुकीचा सोनोग्राफी रिपोर्ट दिल्याबाबत तक्रार प्राप्त झाली असून, या प्रकरणाची सखोल चौकशी केल्यानंतर संबंधित सेंटरवर कायदेशीर कारवाई केली जाईल, असे त्यांनी सांगितले आहे.
एका लोकप्रतिनिधीच्या बाबतीत अशी चूक होऊ शकते, तर सामान्य जनतेचे काय होत असेल, असा संताप स्थानिक नागरिकांमधून व्यक्त होत आहे. अशा चुकीच्या रिपोर्टमुळे रुग्णावर चुकीचे उपचार होऊन त्याच्या जिवावर बेतू शकते, अशी भीतीही आता व्यक्त केली जात आहे.
