Online Betting : ऑनलाइन बेटिंग प्रकरणात अनेक मोठ्या व्यक्तींची चौकशी करण्यात आली आहे. ईडीच्या सूत्रांनी याबाबत माहिती दिली आहे. ईडीने माजी भारतीय क्रिकेटर युवराज सिंग, हरभजन सिंग आणि सुरेश रैना यांची चौकशी केली. यासोबतच या प्रकरणात बॉलिवूड अभिनेते सोनू सूद आणि उर्वशी रौतेला यांचीही चौकशी केली जात आहे.
बंदी घातलेल्या प्लॅटफॉर्मना का प्रमोट केले जाते आहे, हे जाणून घेण्यासाठी ईडीची ही कारवाई केली जात आहे. यामध्ये वन बेट, फेअर प्ले आणि महादेव ऑनलाइन बेटिंग प्लॅटफॉर्मचा समावेश आहे. या संदर्भात ईडीची ही कारवाई माजी क्रिकेटपटू आणि बॉलिवूड अभिनेत्यांवर केली जात आहे.
(नक्की वाचा- Kashedi Ghat Tunnel: कशेडी घाटातील बोगद्याला गळती, कोकणात जाणाऱ्या चाकरमान्यांची मोठी कसरत)
अलिकडेच, कोलकाता येथे अंमलबजावणी संचालनालयाने (ईडी) मनी लाँड्रिंग कायद्यांतर्गत एका मोठ्या ऑनलाइन बेटिंग आणि मनी लाँड्रिंग रॅकेटचा पर्दाफाश केला आहे. या रॅकेटचा पर्दाफाश करण्यासाठी, पश्चिम बंगालसह दिल्ली, बिहार, उत्तर प्रदेश आणि आसाममध्ये पसरलेल्या अनेक ठिकाणी शोध मोहीम राबवण्यात आली. या कारवाईदरम्यान, मोठ्या प्रमाणात इलेक्ट्रॉनिक डिव्हाईस आणि संशयास्पद कागदपत्रे जप्त करण्यात आली.
या कारवाईदरम्यान, ईडीने या बेकायदेशीर सट्टेबाजी आणि जुगाराशी संबंधित पैशांच्या व्यवहारांसाठी वापरल्या जाणाऱ्या 766 बँक खाती आणि 17 डेबिट आणि क्रेडिट कार्ड गोठवले. ईडीने विशाल भारद्वाज उर्फ बादल भारद्वाज आणि सोनू कुमार ठाकूर या दोन आरोपींना पीएमएलए अंतर्गत अटक केली. दोघांनाही कोलकाता येथील विशेष न्यायालयात हजर करण्यात आले, जिथून त्यांना 10 दिवसांसाठी ईडी कोठडीत पाठवण्यात आले.
(नक्की वाचा - Mumbai Water Supply : मुंबईकरांनो पाणी जपून वापरा, 'या' भागातील पाणीपुरवठा 11 तास बंद !)
महादेव ऑनलाइन बेटिंग अॅपवर कारवाईचा फास आवळला
एप्रिल महिन्यातही महादेव ऑनलाइन बेटिंग अॅप प्रकरणात अंमलबजावणी संचालनालयाने मोठी कारवाई केली होती. त्यानंतर ईडीने या प्रकरणात विविध ठिकाणी छापे टाकून 573 कोटी रुपयांची मालमत्ता गोठवली होती. 16 एप्रिल 2025 रोजी मनी लाँडरिंग प्रतिबंधक कायद्याअंतर्गत दिल्ली, मुंबई, इंदूर, अहमदाबाद, चंदीगड, चेन्नई आणि संबलपूर (ओडिशा) येथील अनेक ठिकाणी छापे टाकले.
या शोध मोहिमेदरम्यान, ईडीने ३.२९ कोटी रुपयांची रोकड जप्त केली. तसेच, ईडीने ५७३ कोटी रुपयांपेक्षा जास्त किमतीचे सिक्युरिटीज, बाँड आणि डीमॅट खाती गोठवली. तसेच, मोठ्या प्रमाणात गुन्हेगारी कागदपत्रे आणि इलेक्ट्रॉनिक पुरावे जप्त करण्यात आले.
