दिल्लीतील ऐतिहासिक लाल किल्ल्याजवळ कारमध्ये झालेल्या भीषण स्फोटाने संपूर्ण देशात खळबळ उडाली आहे. या स्फोटात सुमारे 9 लोक ठार झाले, तर अनेकजण जखमी झाले आहेत. भारतीय तपास यंत्रणा या घटनेचा कसून तपास करत आहेत. अशा परिस्थितीत, पाकिस्तानी वृत्तपत्रांमध्येही ही बातमी प्रसिद्ध झाली.
पाकिस्तानी वृत्तपत्रांमधील प्रमुख मुद्दे
'डॉन' वृत्तपत्र
डॉन वृत्तपत्राने "नवी दिल्लीतील लाल किल्ल्याजवळ झालेल्या स्फोटात किमान आठ जणांचा मृत्यू: स्थानिक मीडिया" या शीर्षकाखाली बातमी दिली आहे. सोमवारी झालेल्या या स्फोटात 8 लोक ठार आणि 20 जखमी झाल्याचे वृत्त स्थानिक टीव्ही वाहिन्यांच्या हवाल्याने देण्यात आले आहे. याच रिपोर्टमध्ये, स्फोटाच्या दिवशी हरियाणात टाकलेल्या छाप्यात 2900 किलो बॉम्ब बनवण्याची सामग्री जप्त करण्यात आली होती, याचाही उल्लेख करण्यात आला आहे.
(नक्की वाचा- Delhi Blast VIDEO: किंकाळ्या, पळापळ, भीतीचं वातावरण... स्फोटानंतरचं भयानक CCTV footage)
'जिओ न्यूज'
जिओ न्यूजने "दिल्ली कार बॉम्बस्फोट प्रकरणाची दहशतवादविरोधी कायद्याअंतर्गत चौकशी सुरू" या हेडलाईनसह बातमी दिली आहे. या वृत्तानुसार, भारतीय पोलीस या घातक कार स्फोटाची तपासणी भारताच्या प्रमुख दहशतवादविरोधी कायदा म्हणजेच 'युएपीए' (UAPA) अंतर्गत करत आहेत. या कायद्याचा वापर दहशतवादाशी संबंधित कृत्ये आणि देशाच्या सार्वभौमत्व आणि अखंडतेला धोका निर्माण करणाऱ्या कारवायांची चौकशी करण्यासाठी केला जातो, यावर त्यांनी भर दिला आहे.
'द एक्सप्रेस ट्रिब्यून'
द एक्सप्रेस ट्रिब्यूनने "भारताच्या राजधानीत झालेल्या कार बॉम्ब स्फोटात किमान आठ जणांचा मृत्यू" या शीर्षकाखाली बातमी दिली आहे. या अहवालानुसार, 8 लोक ठार आणि 19 जखमी झाले असून, ही घटना भारतीय राजधानीच्या गजबजलेल्या भागात झाली. पोलिसांनी स्फोटाच्या कारणाबद्दल अधिक माहिती दिली नसली तरी, फॉरेन्सिक आणि दहशतवादविरोधी एजन्सी घटनास्थळी तपास करत असल्याचे नमूद केले आहे.
'पाकिस्तान टूडे'
पाकिस्तान टूडेनेही मृतांची संख्या 8 असल्याचे सांगितले असून, हा स्फोट लाल किल्ल्याजवळील कारमध्ये झाल्याचे आणि त्यामुळे आग लागून अनेक वाहने नुकसानग्रस्त झाल्याचे म्हटले आहे.
या अहवालांवरून हे स्पष्ट होते की, पाकिस्तानी प्रसारमाध्यमे या घटनेकडे एक गंभीर सुरक्षा समस्या म्हणून पाहत आहेत. त्यातही तपास दहशतवादविरोधी कायद्याखाली होत असल्याचे वृत्त त्यांनी प्रकाशित केले आहे.
