प्रांजल कुलकर्णी, प्रतिनिधी
हिंदुस्थान पेट्रोलियम कॉर्पोरेशन लिमिटेड (HPCL) या ऑईल कंपनीच्याच्या सॅप प्रणालीमध्ये (Systems, Applications & Products in Data Processing) तांत्रिक बिघाड झाल्यामुळे गेल्या 36 तासांहून जास्त कालावधीपासून कंपनीचे पेट्रोल व डिझेल पुरवठा यंत्रणा ठप्प झाली आहेत. या अडचणीमुळे इंधन पुरवठा करणाऱ्या HPCL च्या देशभरातील सर्व डेपोमधून पेट्रोल पंपाला पुरवठ्याचं कामकाज ठप्प झालं असून, परिणामी अनेक पेट्रोल पंपांवरील इंधन पुरवठा विस्कळीत झाला आहे.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
कंपनीचे तांत्रिक तज्ज्ञ सदर प्रणाली पूर्ववत करण्याचे काम युद्धपातळीवर करीत असल्याची माहिती आहे. त्याचप्रमाणे सदर पुरवठा हा मॅन्युअल मोड मध्ये देखील सुरळित करण्याचे काम सुरू आहे परंतु सर्व प्रणाली संलग्न असल्याने त्यात देखील पाहिजे तशी सुधारणा होत नाहीये त्यात सुधारणा न झाल्यास सर्व स्थिती सुरळीत होण्यासाठी अंदाजे आणखी 48 तास लागू शकतात.
नक्की वाचा - Operation Sindoor नंतर सुरक्षेत वाढ, देशभरातील 26 विमानतळं 10 मेपर्यंत बंद; ही आहे संपूर्ण यादी
घाबरून जाऊ नये, ही केवळ तांत्रिक अडचण असून पेट्रोल अथवा डिझेल याची कोणतीही टंचाई नाही, असं कंपनीकडून सांगण्यात आलं आहे. इंडियन ऑईल, भारत पेट्रोलियम यांसारख्या इतर कंपन्यांचे वितरण सुरळीत सुरू असून इंधन सहज उपलब्ध आहे. तरी कृपया अफवांवर विश्वास ठेवू नये आणि संयम राखावा इतर पंपावर गर्दी करू नये. कोणत्याही प्रकारची इंधन टंचाई झालेली नाही, केवळ तांत्रिक प्रणाली सदोष असल्याने अडचण निर्माण झाली आहे. सर्व परिस्थिती लवकरच सामान्य होईल.
