Budget 2025: प्रत्येक बजेटच्या आधी 'हलवा' का बनवतात? काय आहे खास समारंभाचे महत्व? वाचा...

Union Budget 2025:  पुढील आठवड्यात म्हणजेच 1 फेब्रुवारी रोजी देशाचा नवा अर्थसंकल्प सादर केला जाणार आहे. केंद्रीय अर्थमंत्री निर्मला सितारामन या नव्या वर्षाचा अर्थसंकल्प सादर करतील. त्याआधी शुक्रवारी निर्मला सीतारमन यांच्या उपस्थितीत हलवा सेरेमनी पार पडला.  संसदेत सादर होणाऱ्या प्रत्येक अर्थसंकल्पापूर्वी हलवा बनवला जातो. हा हलवा नेमका का बनवला जातो? प्रत्येक अर्थसंकल्पापूर्वी होणाऱ्या या खास सेरेमनीचे नेमके कारण काय? जाणून घ्या सविस्तर... 

('NDTV मराठी' चं अधिकृत व्हॉट्सअ‍ॅप चॅनल जॉईन करा )

काय आहे हलवा सेरेमनी?

केंद्रीय अर्थसंकल्प तयार करण्याच्या प्रक्रियेच्या सुरुवातीचे प्रतीक म्हणून भारत सरकारच्या अर्थ मंत्रालयाकडून हलवा सेरेमनी आयोजित केला जातो. अर्थसंकल्प सादर करण्याच्या काही दिवस आधी आयोजित केलेला हा कार्यक्रम, खास हलवा बनवून तो मंत्रालयातील कर्मचाऱ्यांमध्ये वाटण्यासाठी प्रसिद्ध आहे. या कार्यक्रमानंतर अर्थसंकल्प तयार करण्यात सहभागी असलेले सर्व अधिकारी आणि कर्मचारी "लॉक-इन" कालावधीत प्रवेश करतात, जिथे त्यांना बाहेरील कोणाशीही संपर्क साधता येत नाही. 

 मंत्रालयाच्या स्वयंपाकघरात पारंपारिक पद्धतीने हा हलवा तयार केला जातो. त्यात प्रामुख्याने रवा, तूप, साखर आणि सुकामेवा वापरला जातो. ते एका मोठ्या तव्यावर शिजवले जाते. हा हलवा तयार करताना स्वत: अर्थमंत्री स्वतः उपस्थित असतात. अर्थ मंत्रालयाचे स्वयंपाकी हलवा समारंभात हा गोड पदार्थ तयार करतात. ते मंत्रालयातील कर्मचारी, अधिकारी आणि इतर कर्मचाऱ्यांमध्ये वाटला जातो. अर्थमंत्री स्वतः ते कर्मचाऱ्यांना देतात, ज्यामुळे हा कार्यक्रम अधिक खास बनतो.

( नक्की वाचा :  Mamta Kulkarni : ममता कुलकर्णी बनली किन्नर आखाड्याची महामंडलेश्वर, महाकुंभात केले पिंडदान, Video )

ही परंपरा अर्थ मंत्रालयातील सर्व अधिकाऱ्यांच्या कठोर परिश्रमाला दाद देण्याचा एक मार्ग आहे. संसदेत सादर करण्यापूर्वी सर्व अर्थसंकल्पीय कागदपत्रे छापण्याच्या प्रक्रियेची सुरुवात हलवा समारंभातून होते. या समारंभानंतर, एक विशेष कालावधी सुरू होतो ज्याला 'लॉक-इन' म्हणतात.

लॉक इन कालावधी म्हणजे काय?

लॉक-इन हा असा कालावधी असतो ज्यामध्ये बजेट तयार करण्याच्या प्रक्रियेत सहभागी असलेले प्रत्येकजण बाहेरील जगापासून पूर्णपणे अलिप्त होतात. बजेटबद्दल कोणत्याही प्रकारची माहिती लीक होण्यापासून रोखणे हा त्याचा मुख्य उद्देश आहे. सहसा, बजेट अधिकारी आणि कर्मचारी नॉर्थ ब्लॉकच्या तळघरासारख्या सुरक्षित ठिकाणी राहतात. या काळात, ते सतत बजेटवर काम करतात आणि ते अंतिम करतात. त्यांना त्यांच्या कुटुंबियांना आणि मित्रांना भेटण्याची किंवा फोन करण्याची परवानगी नसते.