तंत्रज्ञान क्षेत्रात सध्या वेगाने बदल होत आहेत आणि वेअरेबल डिव्हाइसेसची मागणी वाढताना दिसत आहे. Meta आणि Oakley या दोन प्रसिद्ध कंपन्यांनी हातमिळवणी केली आहे. या दोघांनी आयवेअर म्हणजेच चष्मे किंवा गॉगलसाठी एक तंत्रज्ञान विकसित केलं असून यातून जन्माला आलेले पहिले प्रॉडक्ट ओकले मेटा एचएसटीएन लवकरच बाजारात येणार आहे. 1 डिसेंबरपासून हे गॉगल्स विक्रीसाठी उपलब्ध होतील असे सांगण्यात आले आहे. विशेष म्हणजे हे ग्लासेस फक्त मिरवण्यासाठी नाहीत, त्यामध्ये AI समाविष्ट करण्यात आले असल्याने हे गॉगल डोळ्याला थंडावा देण्याशिवायही बरीच कामे करणार आहेत.
नक्की वाचा: कोरड्या खोकल्यावर 4 घरगुती उपाय, रात्री लागेल शांत झोप
तगडी बॅटरी जबरदस्त बॅकअप
या स्मार्ट ग्लासेसची रचना प्रामुख्याने खेळाडू आणि रोज गॉगल किंवा चष्मे घालून काम करणाऱ्यांना डोळ्यासमोर ठेवून करण्यात आली आहे. यामध्ये हँड्स-फ्री कॅमेरा, ओपन-इअर स्पीकर्स आणि आयपीएक्स4 दर्जाचे तंत्रज्ञान वापरण्यात आले आहे, ज्यामुळे पाण्याचा यावर परिणाम होत नाही. वेगाने धावताना, व्यायाम करतानाही हे चष्मे वापरणे सोयीचे ठरतील असे कंपनीतर्फे सांगण्यात आले आहे. बॅटरी बॅकअपच्या बाबतीतही कंपनीने मोठा दावा केला आहे. एकदा चार्ज केल्यानंतर हे ग्लासेस सलग 8 तास कार्यरत राहू शकतात, तर स्टँडबाय मोडवर 19 तास कार्यरत राहतात. यासोबत येणाऱ्या चार्जिंग केसमुळे वापरकर्त्यांना अतिरिक्त 48 तासांचा पॉवर बॅकअप मिळतो, ज्यामुळे प्रवासात चार्जिंगची चिंता भेडसावणार नाही असे कंपनीचे म्हणणे आहे. या आयवेअरमुळे 3के हाय-रिझॉल्यूशन व्हिडिओ रेकॉर्डिंग करता येते.
नक्की वाचा: धोक्याची घंटा! AI मुळे तरुणांमध्ये एकटेपणा वाढतोय
पेमेंट आणि हिंदीतून व्हॉईस कमांडचा पर्याय
भारतीय बाजारपेठ लक्षात घेता कंपनीने या ग्लासेसमध्ये काही विशेष बदल केले आहेत. मेटा एआयचं पाठबळ लाभलेल्या या आयवेअरमुळे हिंदी भाषेतूनही संवाद साधता येऊ शकेल. वापरकर्ते 'हाय मेटा' म्हणून थेट हिंदीतून प्रश्न विचारू शकतात किंवा कॉल करू शकतात. याशिवाय, मेटा एआयमध्ये सेलिब्रिटी व्हॉईस फिचरचा समावेश करण्यात आला असून, त्यात प्रसिद्ध अभिनेत्री दीपिका पदुकोण हिचा आवाज इंग्रजी भाषेत उपलब्ध करून देण्यात आला आहे. या आयवेअरची सगळ्यात मोठी खासियत म्हणजे यूपीआय-लाईट पेमेंट सिस्टीम. या चष्म्यात लवकरच 'यूपीआय स्कॅन अँड पे' हे फिचर येणार आहे. कोणत्याही क्यूआर कोडकडे एकटक बघून 'हाय मेटा, स्कॅन अँड पे' म्हटलं की तुमचं काम झालं. तुमचे पेमेंट लगेच होईल कारण हे फिचर व्हॉट्सॲप पेमेंटशी लिंक केलेले असेल. हे आयवेअरची किंमत 41,800 रुपयांपासून सुरू होत असल्याचे सांगण्यात आले आहे. .
Track Latest News Live on Marathi.NDTV.com and get news updates from India and around the world
