Termite Infestation Risks: जेव्हा जेव्हा आपण घरामध्ये वाळवी (Termite) लागल्याचे पाहतो, तेव्हा सर्वात पहिला विचार हाच येतो की आता आपला महागडा सोफा, कपाट किंवा बेड खराब होणार. आपण या गोष्टी वाचवण्यासाठी लगेच पेस्ट कंट्रोल करतो. पण तुम्ही कधी विचार केला आहे का, की ही लहानशी वाळवी तुमच्या आणि तुमच्या कुटुंबाच्या आरोग्याला किती मोठे नुकसान पोहोचवत आहे? होय, वाळवी फक्त लाकडाचीच शत्रू नाही, तर ती तुमच्या आरोग्यासाठीही धोकादायक आहे.
श्वास घेण्यास त्रास
वाळवी जेव्हा लाकूड कुरतडते, तेव्हा लाकडाचा बारीक भुसा आणि धूळ हवेत पसरते. यासोबतच वाळवीची विष्ठा आणि तिच्या लाळेचे बारीक कणही हवेत मिसळतात. जेव्हा आपण या हवेत श्वास घेतो, तेव्हा हे बारीक कण थेट आपल्या फुफ्फुसात जातात. यामुळे सतत खोकला, शिंका येणे आणि दम लागणे यासारखे त्रास होऊ शकतात.
(नक्की वाचा: Total Hip Replacement Surgery: 162Kg वजन, असह्य वेदनेमुळे चालणंही होतं कठीण! पण डॉक्टरांनी करून दाखवला चमत्कार)
फंगस आणि बुरशी
वाळवी नेहमी अशा ठिकाणी वाढते जिथे ओल किंवा दमटपणा असतो. वाळवी राहिल्यामुळे संबंधित भागातील दमटपणा आणखी वाढते, ज्यामुळे भिंतींवर आणि लाकडावर काळ्या रंगाची बुरशी जमा होऊ लागते. ही बुरशी हवेत आपले अदृश्य कण सोडते. जेव्हा हे कण आपल्या शरीरात जातात, तेव्हा भयानक फंगल इन्फेक्शन आणि फुफ्फुसाचे गंभीर आजार निर्माण होऊ शकतात.
(नक्की वाचा: Cauliflower Cleaning: सावधान! पावसाळ्यात फ्लॉवर खाण्यापूर्वी पाहा हा VIDEO! नाहीतर पोटात जाईल घाण, अळ्या, कीटक)
स्किन इन्फेक्शन आणि खाज
तुमच्या घरात अचानक कोणाच्या अंगावर लाल रंगाचे चट्टे, तीव्र खाज किंवा पुरळ येऊ लागले आहे का? याचे कारण वाळवी असू शकते. वाळवीच्या संपर्कात आलेली धूळ किंवा त्यांनी सोडलेले बारीक कण जेव्हा आपल्या त्वचेच्या संपर्कात येतात, तेव्हा 'काँटॅक्ट डर्मेटायटिस' म्हणजेच त्वचेची ॲलर्जी होऊ शकते. यामुळे त्वचा लाल होते आणि सतत खाज सुटू शकते.
रीसर्चमधील माहिती
नॅशनल लायब्ररी ऑफ मेडिसिन (PubMed) मध्ये प्रसिद्ध झालेल्या संशोधनानुसार, वाळवीमध्ये अशी प्रथिने (प्रोटीन्स) आढळतात, जी मानवांमध्ये थेट गंभीर ॲलर्जी आणि त्वचेवर पुरळ निर्माण करू शकतात. नॅशनल लायब्ररी ऑफ मेडिसिन (PMC NIH) मध्ये प्रसिद्ध झालेल्या या अभ्यासातून समोर आले आहे की, वाळवीच्या विष्ठेतून उडणारे बारीक धुळीचे कण जेव्हा श्वासावाटे शरीरात जातात, तेव्हा ते फुफ्फुसाच्या मार्गाला सूज आणून दम्याचा (अस्थमा) त्रास वाढवू शकतात.
वाळवीपासून स्वतःचा बचाव कसा करावा?
- घरात कुठेही पाणी गळती होऊ देऊ नका, कारण दमटपणा हेच वाळवीचे घर आहे.
- वेळोवेळी घरातील खिडक्या उघड्या ठेवा, जेणेकरून सूर्यप्रकाश आणि ताजी हवा आत येऊ शकेल.
- जर घरात वाळवी दिसत असेल, तर घरगुती उपायांवर अवलंबून न राहता, ताबडतोब पेस्ट कंट्रोलची मदत घ्या.
(Disclaimer: NDTV Marathi या माहितीची जबाबदारी घेत नाही. अधिक माहितीसाठी तज्ज्ञ/डॉक्टरांचा सल्ला घ्यावा.)
