First 'Borewell Boy' Prince: भारतातील बोअरवेलमध्ये पडलेल्या मुलांच्या बातम्या आपण अनेकदा ऐकतो, पण या सगळ्या थराराची पहिली आणि सर्वात मोठी बातमी ज्या मुलामुळे अख्ख्या जगासमोर आली, तो म्हणजे हरियाणाचा छोटा 'प्रिन्स'. आज बरोबर 20 वर्षांनंतर तोच प्रिन्स पुन्हा एकदा चर्चेत आला आहे. काळाच्या ओघात आपण प्रिन्सला विसरलो असलो तरी, 60 फूट खोल अंधाऱ्या खड्ड्यात त्याने मृत्यूशी दिलेली ती झुंज आजही अनेकांच्या अंगावर काटा आणते. पण आज तो छोटा प्रिन्स काय करतोय आणि त्याचे आयुष्य कसे बदलले आहे, हे जाणून घेणे खरोखरच प्रेरणादायी आहे.
कसा झाला होता अपघात?
20 वर्षांपूर्वीची ती दुपार आजही प्रिन्सच्या डोळ्यांसमोर जशीच्या तशी उभी राहते. प्रिन्स आणि त्याचा मित्र अंग्रेज ट्युबवेलच्या बोअरवेलजवळ खेळत होते. खेळता खेळता त्यांना एक छोटा उंदीर दिसला आणि बालसुलभ कुतूहलापोटी ते त्या उंदराचा पाठलाग करू लागले. तो उंदीर बोअरवेलच्या खड्ड्यात शिरला, ज्यावर केवळ एक पोते झाकलेले होते.
उंदराला पकडण्यासाठी दोघांनी त्या पोत्यावर उडी मारली आणि अचानक ते पोते फाटले. अंग्रेजने स्वतःला सावरले, पण अवघ्या काही सेकंदात 5 वर्षांचा प्रिन्स 60 फूट खोल अरुंद खड्ड्यात कोसळला.
( नक्की वाचा : Dhurandhar 2 मधील दाऊदचं आजारपण खरं की खोटं? वाचा अंडरवर्ल्डच्या पडद्यामागचं सत्य सांगणारा विशेष Review )
लष्कराचे 50 तासांचे महाऑपरेशन
प्रिन्स खड्ड्यात पडल्याचे समजताच एकच खळबळ उडाली. स्थानिक प्रशासनाचे सर्व प्रयत्न अपयशी ठरल्यानंतर अखेर भारतीय लष्कराला पाचारण करण्यात आले. तब्बल 50 तास हे रेस्क्यू ऑपरेशन चालले. प्रिन्स सांगतो की, त्याला आजही त्या अंधाऱ्या खड्ड्यातील काही गोष्टी आठवतात.
प्रिन्सचे आई-वडील वरुन त्याला धीर देत होते की, "प्रिन्स घाबरू नकोस, आम्ही तुला बाहेर काढू." त्याला वर ओढण्यासाठी एक दोरी सोडली होती, ज्याला बल्ब लावलेला होता. प्रकाश मिळावा म्हणून लावलेला तो बल्ब इतका गरम झाला की प्रिन्सचे हात भाजले आणि त्याने ती दोरी सोडून दिली. अखेर लष्कराने समांतर खड्डा खोदून एका पाईपच्या मदतीने 50 तासांनंतर प्रिन्सला सुरक्षित बाहेर काढले.
आज काय करतो प्रिन्स?
आज तो 5 वर्षांचा प्रिन्स एक विशीतला तरुण झाला आहे. त्याचे शरीर सुदृढ आहे आणि तो पूर्णपणे निरोगी आहे. बाहेर आल्यानंतर त्याने सैन्यात भरती होऊन देशाची सेवा करण्याचे स्वप्न पाहिले होते. त्यासाठी त्याने खूप मेहनत घेतली, व्यायाम करून शरीर कमावले, पण दुर्दैवाने उंचीच्या अटीमुळे त्याचे सैन्यात जाण्याचे स्वप्न अपूर्ण राहिले.
मात्र, त्याने हार मानली नाही. त्याने आयटीआय (ITI) चे शिक्षण पूर्ण केले असून सध्या तो एका चांगल्या नोकरीच्या शोधात आहे.
मृत्यूला हरवणारा प्रिन्स आज आपल्या पायावर उभे राहण्यासाठी आणि कुटुंबाला आधार देण्यासाठी धडपडत आहे. 20 वर्षांपूर्वी ज्या मुलासाठी संपूर्ण देशाने प्रार्थना केली होती, तो आज एका सामान्य तरुणासारखाच जिद्दीने आपले आयुष्य जगत आहे. संकटात कसे टिकून राहायचे, याचे चालतेबोलते उदाहरण म्हणजे हा 'बोअरवेल बॉय' प्रिन्स.
