Bar and restaurant strike : महाराष्ट्रातील बार आणि रेस्टॉरंट उद्या बंद राहणार (Bars and restaurants closed tomorrow) असल्याने मद्यप्रेमींचे हाल होणार आहेत. पेगच्या पेग रिचविण्यासाठी आणि त्यासाठी सेवा देणाऱ्या बार-रेस्टॉरंटमध्ये उद्या बसता येणार नाही. उद्या महाराष्ट्रातील सर्व बार आणि रेस्टॉरंट बंद राहणार असल्याचं त्यांनी जाहीर केलं आहे. महाराष्ट्रातील सुमारे 20,000 बार मालकांनी संपावर जाण्याचा इशारा दिलाय. यामध्ये मुंबई आणि आसपासच्या परिसरातील 8,000 बारचा समावेश आहे.
राज्य सरकारने उत्पादन शुल्कात (Excise duty) थेट 60% वाढ केली आहे. याचा बार चालकांकडून विरोध केला जात आहे. यापूर्वी सरकारच्या माध्यमातून 10 टक्के व्हॅट देखील लावण्यात आला होता. आता परवाना शुल्कात देखील थेट 15% ची वाढ करण्यात आली आहे. या सगळ्या विरोधात उद्या बार चालकांनी संप पुकारला आहे.
'बार'वाल्यांनी संप का पुकारला?
असोसिएशन ऑफ हॉटेल्स अँड रेस्टॉरंट्स (AHAR) या संघटनेने संपावर जाणार असल्याचा इशारा दिला आहे. सरकारने परवाना शुल्क,मूल्यवर्धित कर, उत्पादन शुल्क यामध्ये वाढ केली होती, ही वाढ मागे घेतली नाही तर संपावर जाऊ असा इशारा बार मालकांनी दिला आहे. AHAR चे अध्यक्ष सुधाकर शेट्टी यांनी म्हटलंय की कोविडनंतर करण्यात आलेल्या दरवाढीनंतर व्यवसाय करणं कठीण होत चाललं आहे खासकरून या दरवाढीनंतर ते अधिकच मुश्कील झाल्याचे शेट्टी यांनी म्हटले आहे.
'बार'व्यवसाय संकटात आलाय!
महाराष्ट्र शासनाने केलेल्या करवाढ "अन्यायकारक करांची त्सुनामी" असल्याचे म्हटले आहे. या करवाढीमुळे अनेक व्यवसाय आणि हजारो नोकऱ्या संकटात आल्याचे त्यांनी म्हटले. करांबद्दल बोलत असताना शेट्टी यांनी म्हटले की, एका वर्षापेक्षा कमी कालावधीत, दारूवरील मूल्यवर्धित कर (VAT) 5% वरून थेट 10% पर्यंत वाढवण्यात आला. यानंतर, आर्थिक वर्ष 2025-26 साठी परवाना शुल्कात 15% वाढ झाली. आता, उत्पादन शुल्कात 60% वाढ झाल्याने बार चालवणे कठीण झाले आहे.
