संकेत कुलकर्णी, प्रतिनिधी
Pandharpur News : आषाढी वारीच्या निमित्ताने सोलापूर जिल्हा परिषदेची विशेष सर्वसाधारण सभा आज पंढरपूर या ठिकाणी संपन्न झाली. यावेळी जिल्हा परिषदेच्या माध्यमातून सोलापूर, सातारा आणि पुणे अशा तीन जिल्ह्यात वारकऱ्यांना दिल्या जाणाऱ्या 61 कोटी रुपयांच्या सोयीसुविधाना मंजुरी देण्यात आली आहे. विशेष म्हणजे या सभेमध्ये पालखी मार्गावर दारूबंदी करण्याचा ठराव करण्यात आला आहे.
मद्य बंदीचा ऐतिहासिक निर्णय...
जिल्हा परिषदेच्या विशेष सभेचा ठराव हा जिल्हाधिकाऱ्यांना पाठवण्यात येणार आहे. त्यामुळे पंढरपुरात जिल्हा परिषदेची सभा होत असताना वारकरी संप्रदायाच्या नीतिमूल्य असणाऱ्या मद्य बंदीचा ऐतिहासिक निर्णय जिल्हा परिषद सदस्यांकडून घेण्यात आला. तसेच यावेळी कुर्डू जिल्हा परिषद गटाचे सदस्य अण्णासाहेब ढाणे यांनी टेंडर काढून झाल्यावर बैठक कशाला बोलावली? असा सवाल करत अधिकारी आणि पदाधिकाऱ्यांची मिलीभगत आहे का ? असा गंभीर आरोप ही बैठकीत केला.
