राष्ट्रीय स्वयंसेवक संघाचे (RSS) सरसंघचालक डॉ. मोहन भागवत यांची गुरुवारी हरियाणा भवनात 40 मुस्लिम धर्मगुरूंशी बैठक झाली. ही बैठक अडीच तासांपेक्षा जास्त काळ चालली. या बैठकीत ऑल इंडिया इमाम ऑर्गनायझेशनचे प्रमुख उमर अहमद इलियासी यांच्यासह अनेक मुस्लिम धर्मगुरू उपस्थित होते. संघाने इतर समुदायांशी सलोखा साधण्याच्या प्रयत्नांचा हा एक भाग होता.
'या' मुद्यावर झाली सहमती
सरसंघचालकांसोबत झालेल्या बैठकीनंतर, लखनऊ येथील टीळे वाली मशिदीचे शाही इमाम मौलाना सैय्यद फ़ज़लुल्ल मन्नान रहमानी म्हणाले की, गेल्या 100 वर्षांत अशी बैठक कधीही RSS प्रमुखांशी या प्रकारची बैठक झाली नव्हती. ते म्हणाले की, ज्या सलोख्याच्या वातावरणात प्रत्येक मुद्द्यावर चर्चा झाली आणि ज्या प्रकारे सरसंघचालक मोहन भागवत यांनी सर्वांचे म्हणणे संयमाने ऐकून घेतले, ते कौतुकास्पद होते. त्यांनी सांगितले की, बैठकीदरम्यान सरसंघचालकांनी अनेक गोष्टी सांगितल्या. अशा भेटी प्रत्येक राज्यात वेळोवेळी होत राहिल्या पाहिजेत, यावर सर्वजण सहमत झाले.
या बैठकीत सहभागी झालेले मुस्लिम विचारवंत फिरोज बख्त म्हणाले की, भाजपमधील मुस्लिम चेहऱ्यांवर मुस्लिमांचा विश्वास नाही. ते म्हणाले की, RSS ने अशा मुस्लिम चेहऱ्यांना पुढे आणले पाहिजे जे मुस्लिम समाजाच्या प्रगतीसाठी सातत्याने काम करत आहेत आणि ज्यांच्यावर मुस्लिमांचा विश्वास आहे.' भारताच्या हिंदू आणि मुस्लिमांचा DNA एकच आहे', या मोहन भागवतांच्या वक्तव्याचीही त्यांनी आठवण करुन दिली.
( नक्की वाचा : RSS मध्ये महिला का नाहीत? राष्ट्रीय पदाधिकाऱ्यानं दिलं मोठ्या आक्षेपाला उत्तर, पाहा Video )
कोणत्या मुद्द्यांवर झाली चर्चा?
या बैठकीत सरसंघचालक डॉ. मोहन भागवत यांच्यासोबत संघाचे सरकार्यवाह दत्तात्रेय होसबोळे आणि राष्ट्रीय मुस्लिम मंचचे इंद्रेश कुमार हे देखील उपस्थित होते. या बैठकीत हिंदू-मुस्लिम यांच्यात एकता आणि शांतता कशी निर्माण करावी, यावर चर्चा झाली. यासोबतच समाजाला विभाजित करणाऱ्या घटकांना संपवण्यावरही चर्चा झाली.
या बैठकीपूर्वी मंगळवारी संघप्रमुख मोहन भागवत म्हणाले होते की, भारतात पंथ-संप्रदायांचे वेगवेगळे दर्शन आहे. पण तरीही वाद न घालता हे सर्व सुरू आहे. आपल्यात शास्त्रार्थ होतात पण भांडणे होत नाहीत. यामुळेच संघाची दृष्टी एक आहे, भले देशात संप्रदाय वेगवेगळे असले तरी. अनेकदा ते परस्परविरोधी देखील असतात, आचार-विचारांमध्ये भिन्नता असते, पण संपूर्ण देश एकाच दृष्टीने वाटचाल करत आला आहे. ते म्हणाले होते की, आम्ही लोकांनी परिवर्तन कधीही आपले शिक्षण किंवा आपले धोरण लादून केले नाही, हीच भारतीय पद्धत आहे.
