Gautam Gambhir News : दक्षिण आफ्रिकेविरुद्धच्या मायदेशातील टेस्ट सीरिजमध्ये 0-2 असा लाजिरवाणा पराभव झाल्यानंतर टीम इंडियाचे हेड कोच गौतम गंभीरच्या अडचणी वाढल्या आहेत. मैदानातील खराब कामगिरीवर आधीच टीका होत असताना, आता त्यांच्या एका पत्रकार परिषदेतील वक्तव्यांमुळे बीसीसीआय (BCCI) नाराज असल्याची माहिती समोर येत आहे. गंभीर यांच्या कार्यपद्धतीवर प्रश्नचिन्ह उभे राहिले आहे. सध्या बोर्डाचा गंभीरला पाठिंबा आहे. पण, पुढच्या वर्षीा होणाऱ्या T20 वर्ल्ड कपमध्ये टीम इंडियाची कामगिरी खालावली तर गंभीरचे भवितव्य लगेचच बदलू शकते, अशी चर्चा आहे.
बीसीसीआयच्या नाराजीचे कारण काय?
टेस्ट सीरिजमध्ये झालेल्या या दारुण पराभवानंतर गौतम गंभीरने जी पत्रकार परिषद घेतली, ती आता वादाचा मुख्य मुद्दा ठरत आहे. सार्वजनिकरित्या पराभवाची सामूहिक जबाबदारी स्वीकारल्यानंतरही, गंभीरनं घेतलेली आक्रमक भूमिका आणि त्यांचे बोलणे बीसीसीआयच्या वरिष्ठ अधिकाऱ्यांना पसंत पडलेले नाही. गंभीर यांनी काही गोष्टींसाठी दुसऱ्यांना दोष देण्याचा किंवा विसंगत वक्तव्य करण्याचा प्रयत्न केल्याचे बोर्डाला वाटत आहे.
हिंदुस्तान टाइम्समधील एका रिपोर्टनुसार, गंभीरने केलेले स्पष्ट आणि थेट भाष्य, विशेषतः कोलकाता टेस्टनंतर खेळपट्टीच्या स्थितीबद्दल केलेले वक्तव्य, हे अनावश्यक वाद वाढवणारे ठरले. बोर्ड त्याच्या या सार्वजनिक वक्तव्याच्या भाषेवर आणि आशयावर खूश नाही. मैदानातील टीमच्या अपयशाला आता मैदानाबाहेरील या नाट्याची जोड मिळाल्याचे दिसत आहे.
( नक्की वाचा : Team India : 'त्यांना काढलं...' विराट-रोहितच्या निवृत्तीचे गुपित उघड! कोहलीच्या भावाचा गंभीर-आगरकरवर मोठा आरोप )
घरच्या मैदानावर खराब रेकॉर्डची चिंता
गौतम गंभीरच्या कोचिंगमध्ये टीम इंडियाचा टेस्ट रेकॉर्ड, विशेषत: मायदेशात सातत्याने होणारे पराभव, ही बोर्डाच्या सर्वोच्च अधिकाऱ्यांसाठी मोठी चिंतेची बाब आहे. यापूर्वी राहुल द्रविड आणि रवी शास्त्री यांच्यासारख्या प्रशिक्षकांच्या काळात भारतीय क्रिकेटसाठी ही गोष्ट अकल्पनीय होती. मात्र, गंभीरच्या कार्यकाळात टीम इंडियाला घरच्या मैदानावर दोन सीरिजमध्ये लाजीरवाणा पराभव पत्करावा लागला आहे.
माजी खेळाडू आणि क्रिकेट तज्ज्ञांकडून गंभीरच्या रणनीतीवर कडक टीका केली जात आहे. गंभीरने स्पेशालिस्ट बॅटर आणि बॉलर्सच्या ऐवजी ऑल-राऊंडर्स आणि पार्ट-टाईमर्सवर अधिक अवलंबून राहण्याचा अवलंब केला आहे, हे प्रमुख टीकेचे कारण आहे. पाच दिवसांच्या फॉर्मेटमध्ये यश मिळवण्यासाठी आवश्यक असलेली स्थिरता (Stability) आणि डेप्थ या रणनीतीमुळे गमावली असल्याचं मानलं जात आहे.
कधी ठरणार गंभीरचं भवितव्य?
रेड-बॉल फॉर्मेटमधील निराशाजनक कामगिरीमुळे गंभीरवरचा दबाव वाढत आहे. त्याला असलेला बोर्डाचा पाठिंबा लवकरच काढून घेतला जाऊ शकतो. मात्र, भारतीय टीमची मायदेशातील पुढील टेस्ट सीरिज ऑगस्ट 2026 पर्यंत नियोजित नाही. त्यामुळे, बीसीसीआय सध्या तरी गंभीरला लगेच टेस्ट टीमच्या प्रशिक्षकपदावरून लगेच दूर करण्याच्या मनःस्थितीत नाही.
व्हाईट-बॉल (White-ball) फॉर्मेटचे कोच म्हणून गंभीरला मिळालेल्या यशाचा यामध्ये मोठा वाटा आहे. पण, आता गंभीरला 2026 टी-20 विश्वचषकात देखील टीमच्या यशाचा आलेख कायम ठेवावा लागणार आहे, अन्यथा त्यांच्या प्रशिक्षकपदाचे भवितव्य धोक्यात येऊ शकते.
