Year Ender 2024 : भारतीय क्रिकेटसाठी (Indian Cricket) 2024 हे वर्ष चढ उताराचं ठरलं. या वर्षी भारतीय फॅन्सची आयसीसी विजेतेपदाची प्रतीक्षा संपली. तब्बल 11 वर्षांनी टीम इंडियानं T20 वर्ल्ड कप जिंकला. भारतीय क्रिकेटसाठी या वर्षातील तो सर्वोच्च क्षण होता. पण, त्याचबरोबर मायदेशात टेस्ट सीरिज न गमावण्याची 12 वर्षांची परंपरा देखील खंडीत झाली. न्यूझीलंड विरुद्धच्या सीरिजमध्ये टीम इंडियाला व्हाईटवॉशची नामुश्की सहन करावी लागली. भारतीय क्रिकेटसाठी हे वर्ष कसं गेलं पाहूया
('NDTV मराठी' चं अधिकृत व्हॉट्सअ‍ॅप चॅनल जॉईन करा )
T20 वर्ल्ड कप विजेतेपद (T20 World Cup 2024)
गेल्या 11 वर्षांपासून आयसीसी स्पर्धेचं विजेतेपद टीम इंडियाला हुलकावणी देत होतं. यंदा ती प्रतीक्षा अखेर संपली. वेस्ट इंडिज आणि अमेरिकेत झालेल्या T20 वर्ल्ड कप स्पर्धेत भारत विश्वविजेता झाला. 2013 नंतर पहिल्यांदाच भारताला आयसीसी स्पर्धेचं विजेतेपद मिळालं. तर 2007 नंतर 17 वर्षांनी T20 वर्ल्ड कप जिंकला.
टीम इंडियाचा कॅप्टन रोहित शर्मा या स्पर्धेत सर्वाधिक रन करणाऱ्या खेळाडूंच्या यादीत दुसऱ्या क्रमांकावर होता. तर जसप्रीत बुमराह आणि अर्शदीप सिंग यांनी स्पर्धेत सर्वाधिक विकेट्स घेतल्या. विराट कोहलीनं फायनलमध्ये सर्वाधिक रन करत विजेतेपदामध्ये योगदान दिलं. हार्दिक पांड्याची ऑल राऊंड कामगिरी तसंच निर्णायक क्षणी सूर्यकुमार यादवनं डेव्हिड मिलरचा कॅच घेतला. या सर्व आठवणी भारतीय फॅन्सच्या दीर्घकाळ स्मरणात राहणार आहेत.
T20 वर्ल्ड कप विजेतेपदासाह कोच राहुल द्रविडनं भारतीय टीमला अलविदा केलं. 16 वर्षांपूर्वाी (ODI World Cup 2007) वेस्ट इंडिजमध्ये झालेल्या वन-डे वर्ल्ड कपमध्ये टीम इंडियाचं आव्हान प्राथमिक फेरीतच संपुष्टात आलं होतं. त्या टीमचा द्रविड कॅप्टन होता. त्यानंतर त्याच देशात द्रविडनं कोच म्हणून भारतीय टीमसोबत विजेतेपद जिंकण्याचं स्वप्न पूर्ण केलं.
रोहित शर्मा, विराट कोहली आणि रविंद्र जडेजा या महान क्रिकेटपटूंनीही वर्ल्ड कप विजेतेपदासह T20 क्रिकेटला अलविदा केला.
( नक्की वाचा : Hardik Pandya : व्हिलन ते हिरो! सारं काही विरोधात असताना हार्दिकनं कसा जिंकून दिला भारताला वर्ल्ड कप? )
KKR चं दमदार कमबॅक (IPL 2024)
कोलकाता नाईट रायडर्सनं (Kolkata Knight Riders) 2016 नंतर पहिल्यांदाच यंदा आयपीएल स्पर्धेच विजेतेपद पटकावलं. श्रेयस अय्यरची कॅप्टनसी आणि गौतम गंभीरच्या मार्गदर्शनाखाली केकेआरनं ही कामगिरी केली. या कामगिरीच्या जोरावरच गौतम गंभीर टीम इंडियाचा हेड कोच बनला. केकेआरकडून सुनील नरीननं सर्वाधिक रन तर वरुण चक्रवर्तीनं सर्वात जास्त विकेट्स घेतल्या.
आयपीएलमध्ये विक्रमी बोली
आयपीएल 2025 साठी झालेल्या मेगा ऑक्शनमध्ये सर्वाधिक बोलीचा विक्रम मोडला. ऋषभ पंतला तब्बल 27 कोटी रुपये मोजून लखनौ सुपर जायंट्सनं खरेदी केलं. आयपीएल स्पर्धेच्या इतिहासात एखाद्या खेळाडूला लागलेली ही सर्वाधिक बोली आहे. ऋषभ पंतनंतर श्रेयस अय्यर (26 कोटी 75 लाख), व्यंकटेश अय्यर (23 कोटी 75 लाख) हे खेळाडू महागडे ठरले. त्यांना अनुक्रमे पंजाब किंग्ज आणि कोलकाता नाईट रायडर्सनं खरेदी केलं.
घरच्या मैदानात नामुश्की
न्यूझीलंड विरुद्ध झालेल्या टेस्ट सीरिजमध्ये टीम इंडियाचा 0-3 असा पराभव झाला. बारा वर्षांनी पहिल्यांदाच टीम इंडियानं होम ग्राऊंडवर टेस्ट सीरिज गमावली. त्यामधील आणखी लाजीरवाणी बाब म्हणजे या टेस्ट सीरिजमधील सर्व सामन्यात भारतीय टीमचा पराभव झाला. भारतीय क्रिकेटच्या इतिहासात पहिल्यांदाच हा लाजीरवणा प्रसंग घडला आहे.
( नक्की वाचा : Rohit Sharma : बुमराहच्या विकेट्सपेक्षा रोहितचे कमी रन, असा कसा टीम इंडियाचा कॅप्टन? )
अश्विनची निवृत्ती
2024 वर्ष संपत असताना महान भारतीय क्रिकेटपटू आर. अश्विननं आंतरराष्ट्रीय क्रिकेटमधून निवृत्ती घेत सर्वांनाच आश्चर्याचा धक्का दिला. अश्विननं 106 टेस्टमध्ये 537 विकेट्स घेतल्या. अनिल कुंबळेनंतर टेस्ट क्रिकेटमध्ये तो सर्वाधिक विकेट घेणारा बॉलर आहे. अश्विनच्या निवृत्तीची बीसीसीआयला कल्पनाच नव्हती, अशी माहिती उघड झाली आहे.
( नक्की वाचा : 'BCCI शी चर्चा झालीच नव्हती,' 'या' खेळाडूच्या निवडीमुळे अश्विननं केली निवृत्तीची घाई? )
नव्या खेळाडूंचे पदार्पण
भारतीय क्रिकेट टीम सध्या स्थित्यंतराच्या टप्प्यात आहे. या वर्षी काही नव्या खेळाडूंनीही पदार्पण केलं. ध्रुव जुरेल, सर्फराज खान, नितीश कुमार रेड्डी, हर्षित राणा यांनी टेस्ट क्रिकेटमध्ये पदार्पण करत क्रिकेट फॅन्सचं लक्ष वेधलं. तर मर्यादीत ओव्हर्सच्या क्रिकेटमध्ये रियान पराग, साई सुदर्शन यांनी पदार्पण केलं.
जय शहांना प्रमोशन
बीसीसीआयचे सचिव जय शहा यांची याच वर्षी आयसीसीच्या संचालकपदी नियुक्ती झाले. ते आयसीसीचे सर्वात तरुण संचालक आहेत. जय शहा यांनी 1 डिसेंबर रोजी पदभार स्विकारला. पाकिस्तानमध्ये चॅम्पियन्स ट्रॉफी 2025 च्या आयोजनाचा तोडगा त्यांनी सोडवला. ही स्पर्धा हायब्रिड मॉडेलने होणार आहे. त्यानुसार टीम इंडिया सर्व सामने पाकिस्तानात नाही तर दुबईत खेळणार आहे.
ऋषभ पंतचं कमबॅक
टीम इंडियाचा विकेट किपर- बॅटर ऋषभ पंतनं यावर्षी क्रिकेकेटच्या मैदानात कमबॅक केलं. डिसेंबर 2023 मध्ये पंतचा गंभीर कार अपघात झाला होता. त्यानंतर पंत फक्त टीममध्ये परतला नाही तर टीम इंडियाच्या T20 वर्ल्ड कप विजेतेपदामध्ये त्याचा महत्त्वाचा वाटा होता. त्याचबरोबर तो आयपीएल इतिहासातील सर्वात महागडा खेळाडूही ठरला. गंभीर अपघातामध्ये बचावल्यानंतर जिद्द आणि निश्चयाच्या जोरावर पंतनं केलेलं हे कमबॅक भारतीय क्रिकेटसाठी 2024 मधील सर्वात प्रेरणादायी गोष्ट ठरली.
